U Pynshngaiñ N Syiem uwa man u MDC ka Mawkhar-Pynthor uwa dang psiah biang cha ka seiñ Congress da ong u wa i chah rem yong ka Congress ha ki 3 tylli ki Constituency ha kani ka Election chiteiñ samoi ym pyndooh mynsien næ pyndooh kyrmen ko kajiak leh.
Hawa klam wa ki laad pathai khubor, u PN Syiem hawa e khublei kyrpang ya kiwa kreh wa kiwa kyrchaan ka Congress kiwa da yieñ skem wei khlem khih ki, da ong u wa i daw wa hakhmat dooh i chah rem ha kani ka Election chiteiñ samoi toh i mih noh yong ki MDC yong ka Party kiwa da yakhun pyrchah won ya ki kyrtong ka Congress wei wa yut seiñ kiwa yahkhmat.
Najrong ini, kawi won i daw toh wa kreh borbah i bor ka poisa khamtam wa kam ki kyrtong kiwa yakhun pyrchah toh ki yong ka sorkar, kamtæ ki paidbah ye ki wow sñiawthooh wa hadooh katwon i noh poisa da man ko ha kani ka Election.
Da ong u wa kam uwi na ki dkhot ka Congress da pdiang u yei chah rem neibhah heijooh i por wa toh leh i rai yong u paidbah, tangwa kam u dkhot wa da wan pynyabi biang cha kani ka seiñ, hadien wa da mih wei seiñ ya ka seiñ thymme ha ki snem wa da lai, oo ym dooh kyrmen næ noh mynsien wot hawa rem Election, deiwa ong wa ini toh du ka Election chiteiñ samoi.
“Lada kyruiñ kam ha Rajabala, u Ashahel D Shira, uwa man u MDC ka Congress da mih noh u hawa khaddooh dooh yow psiah cha ka UDP yow yakhun ya kani ka Election wei da yoh u hadooh 7000 Vote tam, kamjooh leh u Lamphrang Blah uwa da mih na ka Congress wow yakhun ya kani ka Election chiteiñ samoi na ka NPP wei da yoh u 5000 tam ki Vote, ini da pynyoo wa wot hawa mih ki wow yakhun pyrchah ya ki kyrtong ka Congress tangwa i wan wa ar yong ki kyrtong ka Congress wei chah rem du da kajiak donhi, da pynyoo wa ka ka Congress ka em ko ya ka ‘Vote Bank’ ha man ki Constituency, kammon u dooh mynsien,” da ong u Pynshngaiñ wei pynsñiaw u yei chaniah wa ha u snem 2023 ka Congress daw yoh ko yei jop wa boon.
