U President ka Hill State People’s Democratic Party (HSPDP), u K. P. Pangniang ha ka yalang lyngkhooh snem wa 53 ka Party da ong u wa ym em ieh mylliñ yei dawa yong ki nadooh wa seiñ ya ka Party.
U Pangniang da ong u wa lada toh nadooh i pynkrehkaam ya ka Inner Line Permit (ILP), i tipmit ya ka ktien Khasi hapoh ka 8th Schedule, i pynbait ya u pood waka Assam wa i dawa ya ka jylla Khasi-Jaintia, ka HSPDP dang yieñ skem ko hajrong kini.
“I da yieñ skem i yeini i dawa la 50 snem kattu neibhah wa yieñ i neibynta ki tre chnong ka jylla,” da ong u.
Heiyatoh wa u pood da ong u wa sñiawsih wa heipor wa ah ya ka Meghalaya na ka Assam ym em pynbait chwa ya u pood hapyrdi ki ar jylla deiwa yooluti u wa ka sorkar MDA hapoh i yahkhmat u Conrad Sangma wa kiwi de kiwa emlang hapoh ka sorkar daw ye wow pynbait yeini.
Da ong u leh wa i daw wa ka HSPDP kawa rim dooh ka seiñ saiñhima hapoh ka jylla da duna ko ya ki MLA ha ki snem wa da lai toh neidaw wa da yut ki cha kiwi ki Party.
“Aw jan 60 ngut ki MLA wa da jop na ka HSPDP ha ki snem wa da dep. Tangwa manda jop ki yut won ki cha ki National Party,” da ong u Pangniang.
Heijooh i por da ong u wa ym em dooh mynsien yeini deiwa kyntu ya ki tre ri wow e laad ya ka Party kawa da chakri ya ka jylla da palat 50 snem.
U heh ka Party da ong u wa ka smat ko wow kreh wa kiwi ki Party wa em yei jooh i pyrkhat heiyatoh wa ki phang wa ka Party yieñ ko wei wow pynman ki kam ka thong krehkaam lang ha ka synchaar khadar.
Heiyatoh wow pynyatylli ya ki Party ri-loom, u Pangniang hawa e nongmuna yei yatoh lok chwa Election waka United Democratic Party (UDP) hapoh i pyrtuid ka Regional Democratic Alliance (RDA) da ong u wa waroh ki Party ri-loom ka jylla toh u ya krehlang jan bha ki yow em yei ya sñiawthooh yow ya chna sorkar deiwa khooid wa suba.
