U Montri wa pait ya ka chnat Kaam Pohyung ha ka jylla, u Lahkmen Rymbui da ong u wa ka chnat pulit ka leh ko ya iwa emkaam wei daw chimkhia leh neibynta wow pynneh ya i suk i saaiñ ha ka jylla wei wow kdoh u khoom ya ki kaam wa sih.
Hawa kylli hajrong i maham yong ka seiñ Hynniewtrep National Liberation Council ya ki paidbah wa ym toh wow jied ya ka seiñ National People’s Party ha kani ka Election chiteiñ samoi, u Rymbui da ong u wa ha ka ri India kawa toh ka ri synchaar paidbah, kiwa chong chnong em ki yei hok wow jied ya u bru næ kawon kawon ka Party katkam i hok wa da pynkhamti da ka Constitution yong ka ri India, wei ym em wa ye u khang ya kiwon kiwon kiwa kwah wow kyrchaan ya kawon kawon ka Party kawa ki sñiaw kawa ye u pynyoh yei angnood yong ki.
U Rymbui da ong u leh wa ka chnat ka chimkhia ko leh yei maham wei pyn-eh ka HNLC wei ka pyrchang ko wow pait wei leh ya iwa bha tam neibynta i suk i saaiñ ha ka jylla, heiwa da ong u wa ka chnat pulit da pynkhlan ko yei bor pulit wa ya ki bor wow lai sonteri ha ki le tylli ki Constituency wow man ka Election.
