U Montri wa pait ya ka chnat Puræ Puthi ka jylla, u Lahkmen Rymbui da ong u wa i tip ya kiwa boon ki ktien man iwa bha, tang wow pynbor u pynemkaam won ya kawon kawon ka jait ktien toh iwa ym yahaap.
Da ong u wa neiliang ka jylla hadooh katni ympu phah ko iwon iwon wow pynman kongsan ya ka ktien Hindi, heiwa da pynrap u deiwa ong wa lada wan mynkna i phah na ka sorkar daw emkaam wow pait yei pynemkaam laitlooid ya ka ktien kamwa jooh man. Da ong u wa ka sorkar kwah chwa ko wow pynpsiah ya ka ktien Khasi wa Garo ha ka Eight Schedule.
U Montri ka jylla da ong u wa i klam u Montri ki Kaam Pohyung ka India, u Amit Shah hajrong i pynemkaam ya ka ktien Hindi toh klam u kam u Chairman ka Parliamentary Language Committee, wei da khana u leh wa ka chnat puræ puthi ympu yoh ko iwon iwon na ka sorkar India wow pynman ya ka ktien Hindi kawa kongsan ha ka jylla.
Da pyntip u wa ka sorkar Meghalaya nadooh wa wanrah ya ka National Education Policy ha u snem 2020, dadep thoh ko cha ka sorkar India, wei ka sorkar India leh dadep pynche ko wa toh u pynneh kamwa man næ wow burom bait ya ka ‘Status Wuo’ heiyatoh wa ka ktien thylliej.
U Rymbui da ong u wa man iwa bha wow tip ya boonjait ki ktien wei kam ka Hindi kawa man kawa le ha i boon kiwa klam ha pyrthai, i tip ya ka ktien Hindi daw yarap ko chiboon ha ki kaam, tangwa ymtoh won wow pynkrehkaam deibor.
