U Symbood Montri Rangbah ka jylla, u Prestone Tynsong da ong u wa i pynbaad u Bernard Marak ya u Montri Rangbah, hajrong i chah kynreh ka Farmhouse ha Edenbari toh iwa bakla.
Da ong u wa ki pulit ym em leh ki ya iwon iwon khlem da yoh yei yutip wa tikna, tangwa lada ong wa leh Politics, toh du ka Politics kawa da leh da u Bernard.
I lai kynreh yong ki pulit ya ka Farmhouse yong u MDC uwa man leh u Vice President ka BJP, u Bernard Marak hajrong i pynbaad wa toh ka thaw wow leh ya ki kaam awria, da pynman ya utai u MDC wow pynbaad wa toh ka buit Politics yong ka sorkar hapoh i yahkhmat yong u Montri Rangbah u Conrad K Sangma, heiwa da pynbaad chooh chooh wa ka sorkar da pynemkaam leh da ki pulit wow phah siat yap syndon ya oo.
Hajrong ini, neiliang u Prestone da ong u wa u Bernard toh u ujor hawa da tip wa ki pulit mut ki wow pynyap ya oo, tangwa hadien wa da dep wow kynreh yei yung da pynmih u ya kam kita ki pynbaad. Da ong u wa ym em kam itæ i pynmih hukum na u Montri Rangbah, na oo kam u Symbood Montri Rangbah lane na u Montri Kaam Pohyung, tangwa toh i kaamram yong ki pulit wow leh yei kaam.
Hawa kylli hajrong i dawa yong ka BJP wow pyndam noh yei pynbaad pyrchah ya u Bernard, neiliang u Prestone da ong u wym ye u pyndam yei chah pynbaad, neibhah katkam ka yutip wa ki pulit da yoh ki, da pynman yei kynreh ym yow leh Politics.
Hajrong i pynbaad yong u Bernard wa katai ka kynreh toh kawa dadep sooh buit chwa, u Prestone da ong u wa yahaap mo wow ieh noh du neidaw wa man u kam uwa yahkhmat ka BJP wa u MDC wei ka sorkar da ekti bait ha ki pulit wow leh yeiwa emkaam.
Puræ leh: Da phah ya ki pulit wow wan siat yap ya nga: Bernard N Marak
