Ka Nongtalang College kawa em hapoh ka Amlarem Sub-Division, West Jaiñtia Hills District toh kawi naki College warim tam haki thaaiñ palatsor ka Ri-loom Jaiñtia kawa da sdang nadooh u snem 1988, tangwa ynne ka sngi da man ko ka wow sah kynmoo neibhah da yoh ko ya ka yung wa pura yong ka hi wa em ha i thaw wa tip kam ka Kyrmia Jongiaw Nongtalang wei da wan wow wai paidbah yaka da u Lahkmen Rymbui, Montri ka chnat Puræ Puthi ka sorkar jylla uwa man leh u MLA ka thaaiñ, heijooh i por jooh man u leh kam u President warim ka Governing Body yong kani ka College.
Ha kani ka sngi da wai lang ya ka Academic Block, Science Block wa Library Block kani ka College wei da wai leh u Montri ya ka Administration cum Auditorium yong ka Nongtalang Govt Secondary School.
U President ka Governing Body wa katni kani ka College, u H.L. Giri da khana u wa kini ki Block waphær waphær da chna lyngba i yarap poisa naka MP Scheme, UGC Scheme wa RUSA.
Da khana u leh wa najrong kini ki College da em leh ka Hostel ki kynthai kawa da jan dep chna katni lyngba i yarap ka NEC wei daw em ko leh yaka Auditorium kawa dang sahteiñ u chna.
Neitæ lyngba i ye wow wai ya kani ka Building, ki kamra chong Class leh daw kyllooid wei daw sdang leh yaka Commerce wa Science Stream.
Kamwa man katni da em dang du ka Arts Stream tangwa i ye wow chna pyndep kattu daw sdang noh sa yaka Commerce wa Science Stream.
Neibynta ka Commerce, u H.L. Giri da khana u wa i chimkhia u MLA ka thaaiñ, neiliang ka sorkar leh da mynjur ko wow pynyoh 5 tylli ki kreh namo ki Post kiwa sikai.
Neiliang u Lahkmen Rymbui hawa kynmoo u yei por wa jooh man u kam u President ka Governing Body kani ka College, da khana u yei lai luti ka College deiwa embyntalang wa kiwi kiwa yahkhmat wow yakhun ya iwa boon wa eh hadooh wa da man kamwa man katni.
Da pynsñiaw u yei sñiawkmen wa iwa eh wa da maad kani ka College heiyatoh wow su ya ka tulop ki wakreh wa kamjooh kiwa sikai ym em de i neibhah lyngba i pynpsiah u yaka hapoh ka thup yong ka People’s College Scheme, ka sorkar da pynlut ko T. 3 klur tam neibynta wow su tulop haka chi snem, chooh chooh neibynta ki kreh kiwa sikai ha ka Commerce Stream da ong u wa ka sorkar da mynjur ko wow su tulop ya 5 ngut kiwa sikai iwa duna T. 60 lak.
Hawa pynsñiaw u yei roi i paar wa da wanrah u hapoh ka thaaiñ Amlarem Constituency wa kynthup nadooh ki thaw sumaar, ki skur, ki College, ki sarok wa kiwi kiwi, ong u kini toh ki wow neh yanom neibhah daw pynmyntoi wot yaka pateiñ wa chadien.
Da kyntu u yaki paidbah wow pyrkhat hawa jied ya kiwa mihkhmat neibhah ym jooh em wa haap na bneiñ khlem da kreh chitom. Wei iyi wa da leh da ong u wa toh deiwa pyrkhat yeiwa emkaam kiwa dooh kamtæ da lai thooh u yei hok ki paidbah.
Da ong u leh wa sñiawhun sakhiat u wa kam u Montri ka chnat Puræ Puthi ha kini ki 5 snem neibhah hapoh ka sorkar da ye wow leh chiboon kiyi kiyi haka jylla hawa yatoh wow chna ya ki thaw puræ, i thung ya kiwa sikai wei khamtam dooh hawa yatoh wa ka Amlarem Constituency yong oo.
Kiwi won wa e yei klam kynthup ya u Principal ka Nongtalang College, u Dr. R.R. Kharkongor, u M. Lyngdoh, Waheh Chnong ka Nongtalang, u K.L. Giri, Headmaster Nongtalang Secondary School, u K. Myrchiang Secretary Governing Body, kiwa wan mihkhmat napoh ka RUSA wa kiwi de.
