U National President ka National People’s Party (NPP) u Conrad K Sangma, da ong u wa i angnood ki paidbah wow yoh ya ki kam pynroi ha kini ki 20- 25 snem ym em mankaam neibhah iyi wa da toh u yoh ym em yoh.
U Conrad da pynsñiaw u yeini hawa klam ha ka yalang pynskem ya kiwa kitkaam ka NPP Pynthorumkhrah Block kawa da pynman ynne ha Golf Club wei da pynbna leh yei pyrtuid u Rocky Hek kam u kyrtong ka Party ha ka Election MLA ha u 2023.
U Conrad uwa man leh kam u Montri Rangbah ka jylla da ong u wa ka Pynthorumkhrah Constituency ha kini ki 20 lane 25 snem, da em boon ki kaam kiwa da toh u pyndep tangwa khlem dep.
“Hanla da yoh yei jop wa heh wei wow em leh ha ki kyrdan waphær waphær, tangwa ki paidbah ym em yoh ki ya ka roi ka paar kawa toh u yoh,” da ong u, deiwa pynrap, “Nga ym kwah O wow kdaw næ klam pyrchah ya uwon uwon neibhah nga ym toh u bru wa klam pyrchah ya uwon uwon, tangwa nga klam O neibynta yong ki paidbah, nga wan O yow klam yei sakhiat, wei ha Pynthorumkhrah da toh u yoh ki kaam pynroi wa boon wei ka imlang sahlang kawa toh u yoh, ym em yoh, kattu i por dapoi wa ya ki paidbah wow jied noh ka luti wa thymme na kawa phi jooh lai phi ha u sarok wym man pura wei kamtæ da toh i por wow jied noh ya uwa yahkhmat wa thymme.”
Ha kani ka sngi, u Conrad da pynbna u leh wow pynyoh ka mang poisa na ka Scheme CMDF na ka bynta kawi ka kari kitbru wa kjut ha Lumshyiap, ka madan yalehbol wa kamjooh leh wow pynheh ya ka yung dorbar yong ka Golflink.
U Conrad da ong u wa neiliang u Rocky Hek du ha kini ki kajiak tayaw da wanrah u ya kini ki phang hakhmat yong oo, kiwa man ki phang ki wym jooh em wa klam lane wanrah.
Da kyrpaad u ya ki paidbah wow kyrchaan pura ya u Rocky Hek, uwa ka seiñ da yoh ko wow sai na Pynthorumkhrah uwa man kam u khynroo uwa da em chwa i yatoh wa ki paidbah wei uwa ye leh u rah ya ki phang wa yatoh wa i eh yong ki paidbah.
