U Montri Khynnah ka sorkar pyrdi namo u Union Minister of State wa pait ya ka Jal Shakti wa Tribal Affairs, u Bishweswar Tudu ynne da pynsñiaw u yei wym hun yei rukom pynkrehkaam ya kiwa boon ki Scheme ka sorkar pyrdi hapoh Meghalaya.
Da ong u wa hawa pait ha ki kot ki sla da kmen bha u tangwa kamwa man sakhiat i kaam ym em kmen u neibhah wa da ye wow pyndep du 30-40% donhi i kreh heiwa da ong u wa oo da phah u wow pyndep yei kreh hapoh i por wa da booh.
U Tudu toh uwa da em ha Shillong yow lai pait yei pynkreh ya ki Scheme ka sorkar pyrdi heiwa ynnin heipor wa pynman ya ka Review Meeting hajrong ini da mih u na ka yalang neidaw wym ye ka sorkar wow pynbiang ya ki kot ki sla heiyatoh wa ka Jal Jeevan Mission wa kiwi de ki Scheme.
Da ong u leh wa kani ka sorkar ym bien ko wow ap yei tyrwa kamjooh i e buit kiwi ki sorkar kamtæ da ong u wa toh u ap yeiwa ong kiwi leh.
Heiyatoh wa i chna ya ki skur Ekalavya Model Residential Schools (EMRS) wa da kyrchaan poisa da ka Tribal Ministry, u Tudu da ong wa em ar tylli kini ki skur ki wym pu dep u chna wei hap wow pyndep chwa u 2024 katkam i angnood u Montri Rangbahdooh ka ri. Da ong u leh wa em kiwa tang u khut Tender leh ym pu dep wei ini toh i kaamram ka sorkar jylla wow pyntikna lai bait wei manda poi u cha Delhi daw pyntikna u wa da sdang kreh noh ya kini wei lada ym sdang daw pyndooh noh ya kitu kiwa da yoh wow leh ya ini i kreh.
Da klam u leh ya ka Amrit Sarovar Mission kawa da thmu wow pynkhai im lane wow chna thymme 75 tylli ki nan um ha kawi pa kawi ka District yow lait nei duna um heiwa da pyntip u wa ka sorkar da dep ko wow jied kiwon ki nan wow leh yeini.
U Tudu da lai pait u leh ya ka Water Treatment Plant wa em ha Mawphlang heiwa da chem u wa toh kawa biang neibhah ym em wa ujor wa yoh ya ka um kawa tngit.
Heiyatoh wa i slem wow pyndep ya ka Greater Shillong Water Supply Scheme (GSWSS) Phase-III, u Montri da ong wa da yoo u ya ki Pipe rong suiñbneiñ hawa lai u cha Mawphlang wei lada slem wow pyndep yeini daw leh yeiwa emkaam deiwa pynrap leh wa sñiawthooh hi u yei chitom wow kit ya ki mar chaneiñ cha wah neibhah ka thaw man ko kawa boon ki loom ki riat.
