U Montri ka chnat Bordiñ ka jylla, u James PK Sangma da ong u wa ka takit wa da thung da ka sorkar wow takit yei kynrum kynram hapoh ka Meghalaya Energy Corporation Limited (MeECL) daw takit ko leh ya i pynbaad tooh bordiñ wa i dor bordiñ ki karkhana kiwa em ha Byrnihat.
Hawa yaklam wa u James ynne ka sngi, da ong u wa i takit wa da thung da ka sorkar daw ye ko leh wow tih bniah ya i rukom krehkaam ka MeECL, deiwa pynrap wa i takit u man ko nadooh i tre wa sdang i pynbaad ya i kynrum kynram hapoh ka chnat.
Da ong u leh wa ka takit wa laitlooid wow khlieh da uwa Judge wa da chongngiah daw takit leh ya ki Scheme ka sorkar pyrdi kam ka Saubhagya Scheme, Smart Meters wa ka DDUGKY najrong i pynbaad thung kreh ya kiwa emyatoh wa ki heh ki haaiñ, i rukom pynku kyrdan ya ki sahep wa i thung kreh ha ki kaam wa lait ha ka chnat.
U James da klam che u leh wa ka sorkar ym maap ko ya ki heh ka MeECL lada chem wa emkti ki ha ki kaam pyrchah aiñ, hadien wa yoh ya ka bui (Report) na ka takit yeiwa da e por wow pyndep hapoh 6 bnai.
