U Chief Executive Member yong ka KHADC u Titosstarwell Chyne da ong u wa dang ini wadep ka phang yaklam wa ki kynthai leh toh u yoh ki wow chong dorbar lang heiwa ki kynthai na Mawlai Pyllum da wan ki wow yachem yow yaklam hajrong kani ka phang wa ki kynthai leh u yoh ki wow em noh ha ki dorbar.
U CEM da ong u wa i sakhiat katkam ka riti dustur yong u Khasi, ki kynthai ym jooh chong dorbar ki wei du ki chynrang kiwa chong dorbar katæ toh ka yurim kam ka jaitbru wa ya uwa em ha katai ka chuki kawa ong wow pynneh pynsah ya ka riti dustur yong ka jaitbru.
Hawa kyruiñ cha i lai yong i por, i dawa yong i por, u CEM da pynkynmoo u ya i lai yong i por, deiwa ong lada kyruiñ leh cha iwa da lai wym jooh sñiaw wa ki kynthai da mih ki ha kiwon kiwon ki kaam kiwa yatoh ha ka imlang sahlang wei i kaam kam ki manbei toh wow pyneh pynsan ya ki khon ki wei wow psa ya ki khon ki kti.
U rangbah daw lai kamai kajih yow pynbiang ya i baam i dih ha yung ha sem wei ini toh nadooh u warim wajah wa u rangbah da man u khadarbor uwa tip ya ka yap ka im, wa tip wow psa ya phi ki manbei wa ki khon ki kti.
Kajiak kattu katni por, i bor yong i stat kawa wan psiah hapoh kani ka ri ka yong i wei hawa nyngkong kiwa lai skur kiwa boon toh ki chynrang ya ki kynthai leh ym pu phah wow lai puræ næ lai skur, tangwa wer wer ki kynthei leh da chimbynta ki hei wow lai skur.
Hadien wa wan i nang i stat, ka rukom im da rap phær, ka rukom pyrkhat leh da rap phær, hawa klam solansar katni ka kamai ym toh du da u chynrang, ki kynthai leh ki ya krehlang ki wow psa ya ki khon ki kti ha ka yung ka sem, la man ha ki yung krehkaam, khayi pateiñ, chongyaw chonghaat wa kamtæ ter ter.
Hawa kyruiñ cha ka synchaar ka khadar, hawa ki manbei da sdang ki wow nang stat kiwa da sdang wow ya chimbynta hawa yatoh wa ka imlang ka sahlang, na ini i daw ha man ki dorbar chnong da mih kitæ ki seiñ manbei, seiñ kynthai kiwa ya embynta lang wa ki dorbar chnong wow yaklam wa ki kaam kiwa yatoh ha ka imlang sahlang.
I ong wa ki kynthai ym jooh tip ki iyi iyi wa ka dorbar chnong rai ko, tangwa hawa ka dorbar chnong ka chim ko ya iwon iwon i rai, da jooh em u Sangot wow pyntip paidbah ya iyi wa rai ki hapoh ka dorbar chnong.
Jooh em leh ka rukom pynlai chnong, lada ym khut ya ka dorbar neibhah da khut ya ka pynlai paidbah kawa chisien chisnem hawa ki manbei ki khon khynroo da ya chimbynta lang hawa ka chnong ka pynsñiaw ko yei rukom krehkaam ka chnong lane iyi i rai.
U CEM da ong u wa i rukom pynlai chnong phær ko na kawi ka chnong cha kawi won wa hap ki wow pynkylla ya ka rukom krehkaam ha ki dorbar chnong katkam i dawa yong i por, tangwa heijooh i por wow ong won u wa ki kynthai u man Rangah Shnong, u man Sordar wa ya katni hi ym pu toh i por.
U CEM da ong u wa dang hap wow ksoh ya ka riti dustur, dang hap wow ksoh yei burom wa akor, tangwa wow ong won wow pynyoh yei hok yong phi ki kynthai wei wow pynsñiaw ya i sur yong phi ki kynthai ym sñiaw yahaap wei itæ ym toh wa phah kset yei ktien ki kynthai, wei toh u em i thaw wow e laad wa ki ye ki wow pynsñiaw yeiwa emkaam.
Wei toh na ini i daw wa i wan i kylla ha i rukom pynlai ha jar jiar ki chnong, da em ki seiñ manbei, da em ki kynhun krehlang, da em ki seiñ ha ki chnong wei neiliang yong u CEM da pynche u leh yei ong hawa yatoh wa Scheme waphær waphær wa ki kynthai ym yoh bynta ki.
Hawa yatoh wa ini, neiliang yong ka KHADC daw wanrah ko ya ka Bill ha kani ka sien chong dorbar wa katkam katæ ka Bill da man wa ha man ki chnong daw em ka “Village Development Council” ha iwa uwa chongknor daw man u rangbah shnong wa ki dkhot yong ka u man neibynta waroh heiwa ya ki kynthai leh daw yoh ki wow ya chimbynta wei ya krehkaam u man ko chisien san snem wei i jied u man ko da ka Election.
U Titosstarwell da ong u wa daw e burom kajiak lada ka kynthai ka boonkaam ko kam ki chynrang daw man iwa eh neibhah wa ki emkaam ki wei kam ki kynthai ym ye ki wow leh kam hei pait miet paitngor, da ong leh wa em ki chnong wa ki kynthai leh da man kam kiwa kitkaam chnong.
Ha kani ka sngi ya ka yalang da yahkhmat da u Pius Rani, Executive Director NESFAS, ka Merisha Nongrum kawa da chongknor ya ka yalang wa ki manbei kiwa da wan wow ya chimbynta toh kiwa na Umsawwar na Mawkynre Block, Plasha Umling Block, Laitsohpliah, Nongtraw wa na Sohra.
Da ong wa kamwa man katni, da em hadooh 28 tylli ki chnong wa ya chimbynta ki kynthai ha ki dorbar chnong wei na kitai, da em hadooh 6 tylli ki chnong wa ki kynthai da chah jied ki kam ki dkhot ka Executive Member ha ka dorbar chnong.
