Kiwa ka’it ya ka Football ha India dang sah ki hei langoh heiwa ympu tip kammon u yoh ki u pait ya ka FIFA World Cup 2026 neibhah hadooh katni ympu em ye u dai ya ka Media Rights namo i hok wow pynyoo ya ki yalehke yong kani ka lympung hanlada sah sadu ar bnai wow sdang ya ka ha ka 11 June 2026. Ini i slem da wanrah i yei sñiawkhia lada yoh u pait Live ya ki yalehke ha kylleiñ ka India lyngba ka TV wa ki Mobile platform.
I sdang wow dai ya ka Media Rights toh nadooh u June 2025, tangwa hadooh katni ympu em wa thied ya ka heiwa katkam ka The Economic Times, da ong ko wa ka FIFA da booh ko ya ka Media Rights neibynta ka lympung 2026 wa 2030 World Cup ha i dor wa $100 million. Tangwa neidaw wa duna i kwah ki Broadcaster, da pynhiar yei dor cha ka $35 million hanla kattæ leh dang duna bha kiwa kwah u thied yeini i hok.
Katkam wa man katni ka JioStar da tyrwa dor ko ya ka Broadcast Rights neibynta ki ar World Cup hei dor wa $25 million (kamwa Rs. 207 klur) wei ini man iwa hiar chlap neiwa jooh ksoh ka Viacom18 ya i hok yong ka FIFA World Cup 2022 hei dor wa $62 million ha u 2021.
Ini i kyntait ki broadcaster toh nei duna i yaknieh neibhah ka Star India wa ka Viacom18 da psiah ki wa ka JioStar, heiwa ym em de kiwi kiwa kwah wow knieh hei dor wa heh. Ki Broadcaster kam ka Sony Sports Network, Eurosport wa FanCode leh da artatien ki neidaw wa heh ware i dor.
Chooh chooh i wym jhan wow thied ya i hok toh neidaw ka yalehke cricket ha India kawa ku bha wei sy’at bha iwa phær bak na kiwi ki yalehke. Ki Broadcaster da pynlut ware ki leh chiboon ha ka International Cricket Council wa ka Board of Control for Cricket in India iwa da pynhiar yei dor ka FIFA World Cup.
Ya ka FIFA World Cup 2026 daw pynman ha United States, Canada wa Mexico wei u man ko ka World Cup kawa heh dooh wow em 48 tylli ki ri.
Discussion about this post