Shillong: U Montri wa pait yei puræ puthi ka jylla, u Lahkmen Rymbui da pynsñiaw u wa ym emkaam wow lai dawa wai skur næ College ha ki chnong palat-sor lada dang kdong ki yei stat du cha sor Shillong.
Hawa kylli yei ye ki thaw puræ ha ka jylla wow pdiang ya ki khynnah kiwa dang dep Pass ha ki kyrdan waphær waphær hadien wa pynmih ya ka Result HSSLC wa SSLC, u Lahkmen da ong u wa ki thaw puræ ha ka jylla biang ki wei ye ki wow pyndap yei emkaam ki khynnah tangwa ymtoh u kyruiñ ki du cha Shillong.
Da kyntu u leh ya ki manbei manpa wa ki khynnah wow kyruñ ki cha ki thaw puræ wa em ha ki chnong yong ki namo ha ki District neibhah katkam ka Result wa dang mih wot da yoo wa ki skur ha ki thaw palat sor ymtoh de kiwa duna, tangwa kiwa yaryngkat kyrdan wa kiwa em ha Shillong.
Chooh chooh da ong u wa katkam wa man katni lada kyruiñ cha ka ‘General Course’ ki Seat ha ki skur wa ki College man ki kiwa pahooh wei ym em i duna wei kam ki khynnah puræ ymtoh u tieñ ki ya dooh Class khamtam hadien i ktah ka khlam COVID-19, deiwa sñiawthooh wa wot kiwa kwah u lai puræ cha baar leh emkaam wow puræ noh ki hapoh ka jylla.
Heiyatoh wa ki ‘Professional Course’, neiliang u Lahkmen da ong u wa hapoh ka jylla ym em ki thaw puræ hajrong ini tangwa neiliang ka sorkar da yaleh ko wow kyntu kynrong ya i puræ puthi chajrong wow pyntoh pynbiang neibynta i emkaam ki khynnah puræ.
U Lahkmen da ong u leh wa hawa kyruiñ won cha ki College kiwa em cha ki chnong palat-sor da ku bha ki, tangwa boon ki khynnah wan ki cha Shillong tangwa da pynksan u leh wa ki thaw puræ wa em cha palatsor man ki kiwa miat bha, deiwa e nongmuna wa ha Patharkhmah Jirang em ka College kawa esikai ‘Science Stream’ wei ki khynnah em ki du ar ngut wei pyn ar pass bha ki, ha Baghmara leh em ka Science Stream kawa em du 5 ngut ki khynnah wei kini leh waroh da Pass lut ki kamhooh ha Sohkha em ka Science Stream tangwa dang duna khynnah bha ko.
Neiliang u montri da ong u leh wa i daw wa kdong yei stat du ha sor Shillong toh i rukom pyrkhat donhi (Mind Set), tangwa katni toh u sñiawthooh wa uni u snem toh uwa em chiboon i eh i khoo wei ymtip ya ka mynried katwa kamtæ emkaam wow pynkylla noh yeini i thij i pyrkhat.
