U Deputy CEM wa pait ya ki kaam aiñ ha KHADC, u Pynshngaiñ N Syiem hawa khana wa ka Khasi Hills Autonomous District Council (KHADC) da yoh ko ya ka muhor u Lat ya ka KHAD (Khasi Social Custom of Lineage) Amendment Bill, 2023 kawa da man aiñ kattu, da ong u wa i chim jait du deiwa leh da ka ‘Affidavit’ iwa da ye u leh nachwa neidaw wym em ka ‘Clan Administration’ hadooh wa da em i duna iwa da pynman wa du da ka ‘Affidavit’ da biang wow e jait, ym ye de u leh kattu.
“Lyngba kani ka aiñ ym em yurim de ya kitu kiwa chim næ e jait Khasi da ka ‘Affidavit’, kattu ka ‘Affidavit’ ym yieñ de ko, neibhah hapoh ka aiñ yong ka KHADC da booh ya ki kyndon kiwa da klam che wow yoh Certificate na u rangbah kur uwa da tipmit da ka Council”, da ong u.
U Pynshngaiñ da ong u leh wa ka KHADC daw phah ko dei thoh cha ki chnat sorkar waphær waphær yow sñiawthooh ki wym ye u leh iyi iyi khlem da bood ya ka ‘Clan Administration’ næ ka aiñ tipmit ya ki kur wa da pynpsiah hapoh ka Lineage Act.
Hawa kylli hajrong i e jait kiwa chongkha khleh, da ong u wow leh ya ka tang jait neini chakhmat ym man ko kawa suk neibhah nachwa uwon uwon u rangbah kur ye u wow soi, tangwa kattu won du u rangbah kur wa da tipmit katkam ka aiñ uwa ye wow e Certificate.
Da ong chooh chooh u wa kitu kiwa kwah wow e jait Khasi hap ki wow tip u klam Khasi, hap ki wow im kam ki Khasi wei hap ki wow bood leh yei man kam ki Khasi.
Hawa yatoh wa i e Schedule Tribe Certificate ya kiwa chongkha khleh, u PN Syiem da ong u kattu lada ym yoh Certificate na u rangbah kur wa da tipmit da ka aiñ ym ye wow pynsakhiat na ka Council, wei ya kiwa artatien wow yoh ya ki ST Certificate, emkaam wow yoh chwa ya ka Clan Certificate wa ka Certificate na u rangbah kur, neibhah ka yung krehkaam ki DC ym ye ki wow lai lait ya ka aiñ.
Discussion about this post