U heh ka National People’s Party (NPP) uwa man leh u Symbood Montri Rangbah ka jylla, u Prestone Tynsong da ong u wa ka sorkar Meghalaya ymye ko wow knieh ya ka mang tangka yong ka jylla wow phah chawi tawon wow pynlut ha Manipur næ cha kiwi ki jylla ka thaaiñ mihsngi.
Ya ini u Prestone da ong u hawa kylli hajrong i pynbaad ka United Democratic Party (UDP) wa ka NPP da rah ko ya ka poisa na jylla Meghalaya wow pynkhlan ya ka Party cha kiwi ki jylla ka thaaiñ mihsngi.
Neiliang u National Vice President ka NPP, da ong u wa katni toh u snem wow yalap Election tæ boi ki bru klam ki kat wa kwah ki. Da ong u wa ka NPP em ko ya ka yurim wa che wei i ym klam ko kat wa yoh ya kiwon kiwon ki kaam.
Da ong u leh wa hawa klam ha ki yalang teiñ teiñ ye u tler u thylliej wei ym tikna u wa em iwon iwon i thmu yeiwa klam ki, neibhah kamwa man katni ka sorkar synrop MDA dang man ko kawa yatylli, wei burom markylliang ko ya kiwi ki seiñ kiwa em ha ka sorkar wei ym e laad ya kiwon kiwon ki pynbaad para ki.
Heiyatoh wa i yakhun pyrchah ya ka NPP, u Prestone da ong u wa ha i yakhun Election chong i ha ki Constituency, neibhah ha Meghalaya ki paidbah ym jied ki ya ka Party, tangwa pait nyngkong ki ya u kyrtong næ u bru wei ka Party wan ko hadien.
