Shillong: U Symbood Montri Rangbah ka jylla, u Prestone Tynsong da kyntu u ya kitu kiwa sah Quarantine ha ki thaw wa da pynkhreh da ka sorkar wow sñiawbha ki wym toh u kwah im kam ha yung, neibhah ki wakreh ka chait i khiah ym ye ki wow pynbiang ya waroh i emkaam yong ki nalor wa kreh ki hadooh wa dooh thiah dooh dem.
Ya ini u Prestone da ong u hadien wa em kiwa sah ha ki Quarantine Centre kiwa phah wow wanrah lang ya ki ksaw yong ki (Pet) ha ki kamra wa sah ki, deiwa ong wa ini i kwah ki man i iwa bakla wei iwa ym sñiawsuk, neibhah ym toh i kaam yalehke, wei toh ka kaam yap kaam im wa ki toh u ya krehlang ki wa kiwa pynlai yaki thaw leh Quarantine.
U Prestone da kyntu u ya waroh kitu kiwa sah ha ki Quarantine Centre wa ya kiwa ha yung hasem wow ya sñiawbha ki wow ya krehlang waka sorkar.
Ha i jooh i por u Symbood Montri Rangbah da kyntu u ya waroh kitu kiwa hap wow pyndep ya ki Quarantine wow yaichah ki, neibhah wa chimpor wow yoh ya ki Report yong ki RT-PCR Test.
Da ong u wa i slem wow yoh yaka Test Result toh wa man ka sngi da chim wei phah ya ki nongmuna (Samples) dang ku i, deiwa ong wa kitu kiwa liwan, hap u sah ki ha Quarantine Centre hadooh wa yoh yaka Report wei wow sñiawbha u yaichah.
