Jowai: Ha kini ki tayaw wa dadep ka sorkar jylla da rai ko wow chah u wanrah ya ki baar jylla chapoh Meghalaya ki wow leh ya ki kreh kiwa ki tre jylla ymye ki wow leh.
Ynne ka sngi hawa yaklam wa u Executive Member ka JHADC wa pait ya ka chnat Taxation wa Trade, u Winning Sungoh da pyntip u wa ka Council da rai ko wa katwa dang em u COVID-19 hapoh u pood ka Council, ka leh ympu e ko ya ka Non Tribal Employees Service License cha ki baar jylla.
Da ong u wa katwa dang em wa chah ktah ha u COVID-19 kamwa man katni hapoh West Jaiñtia Hills, ka chnat Taxation ka Council ympu e ko kawon kawon ka License cha ki baar jylla wei u sdang e biang ko ya ki toh du hadien wa da wiar uni u khñiang namo wym em de wa chah ktah hapoh u pood ka Council.
Chooh chooh da ong u wa ka Council kyntu ko ya ka sorkar jylla wympu toh u chah ko wow wanrah bru wakreh na baar neibhah wot ki Dorbar Chnong leh dang tieñ sorsa ki wow wanrah bru na baar.
Heiyatoh wa ki kaam ki kreh wa da chah ka sorkar, u Winning da kyntu u ya ki tre dukan wa kiwa pynkreh wow pynemkaam chwa da ki tre chnong katwa ye ki khamtam ha ki bynta wa ye ki tre chnong wow kreh.
Da pyntip u leh wa ya kani ka rai u pynkrehkaam ha West Jaiñtia wa kamjooh leh ha East Jaiñtia Hills District kiwa em hapoh u pood ka Council.