Ka jylla Meghalaya da yoh khunsnaam ko na ka sorkar pyrdi kam chibynta ka World Tourism Day 2024 kawa da lehkmen ha ka Vigyan Bhawan, New Delhi heiwa da emlang u Vice President ka ri India, u Jagdeep Dhankhar kam u kongsan deilang wa ki Montri ka sorkar pyrdi.
Ki ar tylli ki chnong wa kynthup ya ka Umden wa Mawphlang da jop ki yei naam National Best Tourism Village Competition wa pynman da ka Ministry of Tourism ka sorkar India heiwa ka Umden da jop ko hapoh ka kyrdan Craft Category kam ka Silk-Weaving Heritage katwa ka Mawphlang won da jop ko ha ka Heritage Category yei pynneh ko ya ka khloo kyntang kamjooh ka dustur riti.
Ka chnong Umden toh kawa em ha Ri-Bhoi District wei da bna naam ko yei pynmih ya u Eri Silk uwa tip leh kam u ‘Ahimsa Silk’ wei kani ka chnong da bna naam ko leh yei rukom thaaiñ that dei rukom wa pynneh pynsah ya ka ram-aw hadooh wa da wan kiwa na kyllieñ wow sakhi yei rukom kreh ki iwa man leh kam ka laad im-ja.
Ya kini ki khusnaam da wan wow pdiang da kiwa mihkhmat kini ki ar chnong wa kynthup ya u Craig Alan Lyngdoh, u khlieh ka Hima Mawphlang; u Lamphrang Blah, Montri ka Hima Mawphlang; u Tambor Lyngdoh, President ka Mawphlang Sustainable Tourism Society; ka Tander Tmung, kawa thaiñ that Eri Silk ha chnong Umden; u Bishar Tmung, waheh chnong ka Dorbar Chnong Diwon, Umden wa ka Blandina Rympeit kawa thaiñ that ha ka Integrated Village Co-operative Society Ltd.
Ini i yoh yei tipmit ka Umden wa Mawphlang wan i hadien wa yoh ka chnong Kongthong ya ka Bronze Medal ynnin u snem ha ka Best Tourism Village Competition.
Discussion about this post