Hawa pynbna yei kyrdan wa yoh ki jylla hawa kyrchaan ya kiwa seiñ khih namo ka States’ Start-up Ranking wa da pynlait paidbah da u Piyush Goyal, Minister of Commerce and Industry ynne ka sngi ha New Delhi, ka Meghalaya da yoh ko yei naam “Best Performer”.
Waroh da em 24 tylli ki jylla wa 7 tylli ki UT kiwa da chimbynta heini wei da bichaar ya ki 7 tylli iwa da pynthymme ki wa 26 tylli ki jait kaam wa da chim ki wow leh heiwa da yabhah ha ki 5 tylli ki jait kyrdan kam ki Best Performers, Top Performers, Leaders, Aspiring Leaders wa Emerging Startup Ecosystem. Kamtæ ka Meghalaya da yoh ko yei naam ‘Best Performers’ deilang wa ka jylla Gujarat wa Karnataka.
Ini da man ko leh kam wow tipmit ya kiwa seiñ khih ka jylla khamtam i yarap ya ki kynthai, kiwa seiñ khih ha ki chnong ki thaw nadooh kiwa khian kamjooh leh yei sdang ka sorkar ya ka PRIME.
Hapoh Meghalaya yow pynchlur ya kiwa seiñ khih da sdang ya ka PRIME (Promotion and Incubation of Market Driven Enterprises) ha u Duyatra (Jan), 2020 yow pynmankaam yei thmu u Montri Rangbah wow e laad ya kiwa kwah u seiñ khih hapoh ka jylla.
Hapoh ka PRIME da chdooh, da pynyoo wei da sikai kammon wow pynmankaam ya ki khih wa da sdang kamjooh wow pynheh pynyaar yei khih i khan lyngba ki PRIME Hub. Da yarap leh ya kiwa seiñ khih wow yoh poisa ki yow sdang kamjooh ki yaw ki haat wow pynlai yaw ya ki mar yong ki wei hadooh katni da em 1,300 ngut kiwa seiñ khih kiwa da yoh myntoi na kani ka PRIME.
Ka PRIME da ye ko wow krehkaam bha deiwa ya krehlang wa ka Commerce & Industries Department deiwa kyrchaan leh ka Meghalaya Basin Management Agency kawa da kreh chitom wow pynkrehkaam ya ka PRIME. Ya ka PRIME leh da ya kdoh ktien wow yakreh kam waka IIMCIP, Amazon India, Facebook/Meta, Invest India, Pernod Ricard India, NESF wa Sauramandala Foundation kam ki Knowledge Partners.
