Ka Dorbar Chnong Namdong B, West Jaiñtia Hills District ha ka 25 tarik uni u bnai da yoh ko ya ka Community Hall næ ka Yung Dorbar wa thymme, ya kawa da wai paidbah da u Waheh Chnong, u Damien S War uwa man leh u kyrtong ka UDP na 10 Mynsngat Khanduli.
Ha kani ka sngi wai ya ka Community Hall da yoh i kyrkhu wei duwai na u Fr. Dominik Kympat heiwa da emlang ki Waheh Chnong ka thaaiñ nadooh u Waheh Chnong ka Namdong A, u Arki Sumer, u Waheh Chnong ka Ladmynngor u Wili Pasi, u Waheh Chnong ka Thadmukoh, u Hopingstar Phawa wa kiwi kiwi.
Da pynman ya ka yalang wa tbian ya kawa da pynlai da u Secretary Chnong u Serus Lipon, da yoh ya ki kyntien pdiang burom na u Assistant Waheh Chnong, u Andreas Sumer wa ki kyntien maitphang na u A. Shadap.
Kiwa klam da yaroh ki chiboon wei da e mynsien ki ya i kreh chitom kiwa kitkaam Chnong kiwa da chakri neibynta i myntoi ki paidbah.
U Damian S War hawa e i klam da yaroh u ya ki paidbah wa chong chnong neibhah dei krehlang wa i e yarap yong ki kamjooh na u MLA wa u MP da yoh ya kani ka yung.
Ya kani ka sngi da pynphooh da ki chaad tynre na ki Dong waphær waphær.
Discussion about this post