Ynnin i janmiet ka VDP yong ka Tuberkmai Shnong, East Jaiñtia Hills da yoh kem ko ya u Ngaitlang Suchiang uwa da yut rieh cha kani ka chnong hadien wa suba wa tynyap u ya ka pyrsa arbei yong oo kawa dang 15 snem ha Muthlongrim, West Jaiñtia Hills District ha ka 12 tarik.
U Ngaitlang da rieh u nadooh ka 12 tarik wei ynnin hadien wa yoh kem ka VDP ya uni u bru da ekti noh ki ya oo cha ki pulit.
Ya ini i yoh kem ya u Ngaitlang da pynsakhiat da u SP ka West Jaiñtia Hills u Bikram D Marak uwa da ong wa myntu ka sngi daw yah ya oo cha ka yung bichaar wei hadien itæ u tip hadooh katwon sngi u kset ya oo.
Da pyntip chooh chooh u wa ya u Ngaitlang da pynngat hapoh ka kyndon tynyap bru ka aiñ.
