U Montri Rangbah ka jylla, u Conrad K. Sangma ynne da e kti u ya ka Chief Minister’s Sports Scholarship Scheme cha 44 ngut kiwa yalehke ha ki 10 tylli ki jait yalehke ha ka yalang wow pyn-eh-daw ya kiwa yalehke ka Meghalaya kiwa daw chimbynta ha ka Khelo India Games 2025 kawa daw pynman ha Bihar nadooh ka 4 tarik hadooh ka 15 tarik uni u bnai.
Waroh kiwa da yoh ya kani ka Sports Scholarship yong u snem 2022-24 wa 2024-25 da em ki 614 ngut.
Kani ka Scheme toh kam chibynta wow e kyrchaan wei wow pynchlur ya kiwa em sap ha ki kaam Sports hapoh ka jylla najrong wa da sdang wow chna ya kiwa boon ki thaw yalehke ha ki 6 snem wa da lai wei man ko leh wow pynkhreh ya kiwa yalehke ka jylla ha ka National Games 2027 kawa daw pynman hapoh ka jylla.
U Conrad hawa e yei klam da ong u wa hadien wa chimkti ka sorkar MDA ha u snem 2018, da chem wa ka jylla toh kawa duna ha waroh ki liang nadooh ki thaw yalehke wa i yarap poisa. Kamtæ ka sorkar da pynim ko ya ka Meghalaya Games kawa da pynman dang du arsien ha ki 48 snem wa da lai kat hadooh u 2019. Wei kattu u pynman ka deiwa lai rah ka cha waroh ki District ka jylla yow chem ya kitu kiwa em yei sap.
Da ong u leh wa hanla kani ka Sports Scholarship Scheme ymtoh kawa heh tangwa da kyntu u ya kiwa yoh ya wow pynemkaam ka dei miat neibhah kani ymtoh ware neibhah ka poisa tangwa yow pynyoo yei sñiawngooh wei tipmit ya kitu kiwa em yei sap.
Heiyatoh wa ka National Games 2027, da ong u wa ka Meghalaya da kreh chitom ko wow pynman ya ki thaw yalehke wa ryngkat kyrdan wa kiwa em cha kiwi ki thaw ha pyrthai wei u pynkhooid leh ya ki thaw kam ka Wah Umkhrah waka Wah Umshyrpi najrong wa pynmiat ya ka Shillong, Tura wa Jowai kiwa daw man ki thaw wa daw embynta ha kani ka National Games.
Discussion about this post