15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Yoh ki waheh chnong yei pynsñiawthooh wow khanglaad yaka Suicide

Advertisement ad1
Advertisement ad1
Advertisement ad1

Jowai: Chibynta ka World Suicide Prevention Day næ wow yada nei pyntkut yabor yei mynsien bru, neiliang ka yung krehkaam u District Medical & Health Officer, West Jaiñtia Hills District lyngba ka District Mental Health Programme Jowai Civil Hospital Ialong, ynne ka sngi da chim ko ka bynta u pynsñiawthooh yaki waheh chnong waphær waphær ka chnong Jowai, hajrong kammon u ya ksohkti lang neibynta u pyndooh pyndam ya ini i kaam, neibhah wa ki waheh chnong em ki i bynta wa khroo haka imlang sahlang wa ki paaid wa chong chnong leh khmied ki cha ki. 

Yeini i pynsñiawthooh da pynman ha Ladthadlaboh Community Hall hajrong ka phang “Working together to prevent suicide” heiwa da wan emlang u Additional SP u B. Chetri kam u kongsan, ka Dr. A.M. Paswet Psychiatrist Nodal Officer DMHP wa kiwi haka yalang wa pynlai da u Dr. E. Dan Programme Officer DMHP.

Ki bru chemphang napoh ka District Mental Health Programme wa kynthup yaka Shelomi Syngkon, Clinical Psychologist, ka Diana Tongper, Psychiatric Social Worker da batai ki yei daw wa ye u yah ya u bru cha u pood wow kwah pyntkut yei mynsien yong oo hi.

Ka Shelomi Syngkon ong ko, i chah ktah heibor pyrkhat toh i kjut wa emkaam bha u yoh yada, neibhah manda u bru ym ye de u wow chah yei ban, hawa kut hei pyrkhat jooh poi u pood wow pynkut noh yei mynsien, kamtæ hawa yoo ya kam kini ki bru toh u jan cha ki deiwa yarap ym toh wow yoobeiñ.

Ong haroh ko wa em soo jait i chitom bor pyrkhat wa kynthup yaka Eustress, Distress, Hyper Stress wa ka Hypo Stress, heiwa ka Eustress toh kawa bha wa mih ha u bru manda jop u hei im, katwa kiwi won ki jait Stress wa pynchitom chitom bor pyrkhat emkam u yait, neitæ u yarap leh ya ki bru wa suba wa em ya kani ka kjut, khnang yow lait ki na iwon iwon i jia wa sñiawsih. 

Kamtæ kyntu haroh ko yaki waheh chnong u yakhun ki katwa ye ya kini ki soo jait wa ktah yei bor pyrkhat khnang yow ye u yada na i Suicide.

Neiliang u Additional SP u B. Chetri hawa klam da pynsñiaw u kattu katni ki bynta yong i lai luti yong ki kam ka chnat pulit wei khana haroh u wa ha uni u snem hadooh u bnai August da em kamwa 10 ngut ki bru wa da pyntkut pyn ya i yong ki hi i mynsien.

Share this:
Previous

Sa T. 23 Klur kyrpaad yarap u Conrad na u Dr. Jitendra neibynta ka SICPAC

Next

99 ngut kiwa dang yoh COVID-19, ha East Jaiñtia 27 ngut wa sa kawi kawa yap ha East Khasi