Hadien wa mih khubor wa daw psiah ki MLA ka UDP cha ka BJP, ynne ka sngi u MLA ka Khliehriat, u Kyrmen Shylla da khut u ya ka yalang paidbah ha Byndihati, East Jaiñtia Hills wow pynche paidbah heiyatoh wa ini i mih khubor.
U Kyrmen hawa e i pynche da ong u wa ya oo da jied da ki paidbah wei sñiaw emkaam hi wow pynche heiyatoh wa ini.
Da ong u wa nadooh u 2018 dei chaniah da jied ya oo wei da pynjop ki paidbah ya oo wei wot ha u 2023 heiwa da jied biang ya oo da pynsñiaw yei khia i chon ki paidbah.
Da khana u wa hadien wa em i thmu pynkylla ya ka aiñ FCRA, da em i tieñsar neibhah wa ye u chah ktah ki yungmane wa kiwi ki kaam wa yoh poisa na baar ri heiwa na ki 9 ngut da lai 8 ngut wow yachem wa u Amit Shah heiwa da emlang u Sambit Batra wow pynsñiaw yei dawa.
U Kyrmen da ong u wa da yaklam ya ka FCRA heiwa da yachem u Lahkmen Rymbui ya ki kattu katni ki heh niam kamjooh u Arch Bishop heiwa da pynsñiaw ki yei eh i khor lada pynkrehkaam ya ka FCRA.
Neiliang u Amit Shah da kular u wa mar krehkaam kani ka aiñ u krehkaam ko chaphrang wei ymtoh neipor wa dadep heiwa ym emkaam u e yukheiñ ya ka poisa wa da yoh nadooh ki por nachwa.
Hajrong ini da pyntip leh wa ka jylla toh ka Scheduled Tribe State wei emkaam wow pynlait ya ka jylla na ka FCRA.
Da yasaaid leh wa na waroh ki Balang Christan du 16% wan ka poisa na baar ri wei kiwa tam toh yong ki Hindu wa Muslim.
Da yaklam leh heiyatoh wa u mooyong, ka MRSSA, ka Them Metor kamjooh wow tipmit ya ki Sengkhasi Niamtre kam ki khian paaid namo ki Minority Status.
Heijooh i por da pynsñiaw ha u Amit Shah ya ka Land Custom wow pynsuk hei wow khayi cha Bangladesh wa kiwi ki jylla.
Neiliang u Kyrmen da pynsñiaw u leh wa da kylli na u Amit Shah, “Sir Koila Kabh Kholega” namo mynnu u wai ya u mooyong.
Da ong u wa nadooh 1970 da sdang ya i khayi mooyong ha Jaiñtia Hills wei ha u 2014 da khang ya i tih mooyong ha ka jylla heiwa da mih leh i yakhih hadooh wow dooh yei mynsien bru na East Jaiñtia Hills wei ki seiñ wa har rukok chirup wa ka sorkar da pynsñiaw ki ha ka sorkar pyrdi heiyatoh wa ini i kaam wei wot hadooh katni ympu ye u leh katkam wa kwah ki paidbah.
Da kubur u wa da sdang ya ka Open Cast Mining heiwa ktah joor bha ko yei lut neibhah ym em thaw wow booh ya i khyndaw wa dadep tih neibhah da ki spah phut wow ngam chapoh wow yoh mooyong.
Hawa sñiaw ya kini waroh, u Amit Shah da ong u wa kat da kini ki dawa weileh ym psiah noh cha ka BJP neibah wa kwah ka seiñ wow em MLA ha Meghalaya heiwa da jooh paan 5 ngut ki MLA khnang wow yoh u wai ya u mooyong heiwa neiliang yong ki da paan por ki wow pyrkhat yeini.
Kamtæ da pyrkhat ki MLA wa deiwa jied ki paidbah ya ki, emkaam leh wow pyrkhat yeini wow pynsñiaw cha ki paidbah hajrong ini neibhah hei sñiaw yong oo lada wai ya u mooyong ym em wa pyrchah ya oo wow psiah cha ka BJP.
Heiyatoh wa ka 8th Schedule da ong u wa lada tipmit ya ka ktien Khasi daw em chiboon i myntoi deiwa tipmit ya ka ktien neibhah daw tipmit ya ka ha waroh kawi ka ri India.
Deiwa kyrmen wow leh ya ki kaam wa bha neibynta ki paidbah ka 6 Khliehriat kamtæ i rai chong i ha ki heiyatoh wa ini i kaam.
Hadien wa klam u Kyrmen kiwi kiwa klam hadien da pynsñiaw ki yei kyrchaan wow psiah BJP lada ye wow wai ya u mooyong wei da e leh yei kyrchaan da ki paidbah wa em heini.
Neiliang u Justine Dkhar uwa man kam u MLA warim ka Khliehriat da ong wa ymtoh wa kor ware ka Party, uwa kor dooh toh u kpoh yong i.
Discussion about this post