Ka International Day of Persons with Disabilities 2025 ha uni u snem da pynman ka hajrong ka phang “Fostering Disability-Inclusive Societies for Advancing Social Progress,” ha ka 3 tarik uni u bnai ha Community Hall ka chnong Moopala, East Jaiñtia Hills District.
Ya kani ka yalang neibynta ki bru wa man kyrpang da pynman da ka Ephatha Society deiwa emlang ka MLA ka Sutnga-Saipung kawa man leh ka Chairperson ka Assembly Committee on Women Empowerment, ka Santa Mary Shylla, ka MDC ka Rymbai Khliehriat, ka Violet Lyngdoh, u President ka Ephatha Society, u Emlangmi Sapuh wa kiwi kiwi de.
Ka MLA hawa e yei klam da kyntu ko ya kiwa chong chnong wym toh u yoobeiñ tangwa wow kyrchaan wei wow ya kynthuplang ya kiwa man kyrpang ha ki kaam waroh kamjooh wow burom ki.
Da pynbna ko leh yei yarap poisa wa Rs. 5 lak cha ka Ephatha Society yow chna ya ka Integrated Farming Centre wa sa Rs. 3 lak won yow kyrchaan ya kiwa man kam ki Persons with Disabilities (PWDs). Da e yaroh ko leh ya ka Ephatha Society wa e sikai ko ya kini kiwa man kyrpang yow ye ki wow seiñ khih kamjooh wow kreh.
Ha kani ka sngi da saam leh ya ki tiar yarap cha kiwa da chah jied na ki 8 tylli ki chnong kiwa da yarap thied napoh ka District Mineral Foundation (DMF) Scheme heiwa da thied ya kawi ka kari ar chaka kawa da pynchna yow suk kiwa duna hei dor i pran wow yah, da saam leh 5 tylli ki Wheelchair, 5 jur ki Auxiliary Crutches, 5 jur ki Elbow Crutches wa 65 tylli ki Blanket cha ki 78 ngut yow pynsuk yei im wei lai i wan ki.
Ha kani ka sngi da pynman leh ki yalehke neibynta kini kiwa man kyrpang nadooh ki rwai, ki chaad, Rolling Ball, Musical Chair, Bottle Colour Matching wa kiwi de.
Cha waroh kiwa chimbynta da e tiar sñiawbha wa kynthup ya ki Bed Cover wa ka bai lai bai wan ki.
Discussion about this post