Hadien ka yalap Election yong ka Indian Trinamool Congress wa da man ynnin i miet ka 10 tarik ha chnong Sohmynting. Ki manbei manpa, ki khynroo khyllood na kani ka chnong kiwa man kam kiwa kyrchaan bor bah ka TMC hapoh i yahkhmat u Adviser yong ka, u T. Bareh, u Secretary Youth Wing, u S. Langshiang wa u President Youth Wing, u M. Langshiang da ya yut noh ki naka TMC wei da psiah won ki cha ka Party NPP.
Ya kini kiwa da wan kyrchaan NPP da pynskem ynne ka sngi hei emlang u kyrtong ka Party NPP naka 2-Jowai Constituency, u Wailadmiki Shylla wa ki waheh wa sian ka Party.
Neiliang u T. Bareh uwa jooh man Adviser ka TMC da ong u wa i kyruiñ yong oo cha ka NPP toh wa chem u ka yurim yong ka TMC ka wym ye u chaniah.
U President ka TMC won khana u wa i mih yong ki na ka TMC toh dei yasñiawthooh yumut lang nadooh ki manbei, ki manpa wa ki khynroo khyllood kiwa da ya krehlang ki chirup ha ka Youth Wing yong ka TMC.
Neiliang ka L. Pyrtuh won ong ko wa hadien wa da tip da sñiawthooh ki wa ka TMC toh ka Party kawa e laad ya ki Bangali kamtæ da pyrkhat ki wow ya psiah noh cha ka NPP ka Party kawa da seiñ da sdang na Jowai.
Da kdaw ko leh wa ka TMC da pynbiej Election don hi ko ya ki manbei lyngba ka WE Card itæ toh wow su ko chi hajar tangka chi bnai, katwa ki sñawthooh ki toh ka wym ye u man wei neiwon u li khloh li chim ki yow su chi hajar tangka chi bnai cha man kawi pa kawi ka manbei.
