Kam chibynta wow yarap ya ki khynnah wa lai puræ Higher Secondary ka East Jaiñtia Hills wow pynjanai ki yei puræ puthi lyngba ka stat Technology, da saam da ki Tablet (M-TAB) hapoh ka Chief Minister’s Students Digital Learning Scheme wei yeini da leh ha ka yalang wa da pynman ha Khliehriat West Community Hall ynne ka sngi.
Ha kani ka sngi da emlang u Montri sorkar uwa man leh kam u MLA ka Khliehriat, u Kyrmen Shylla kam u kongsan, u Deputy Commissioner, East Jaiñtia Hills District, u Shivansh Awasthi, ka District School Education Officer, East Jaiñtia Hills District, ka A. Syiem, kiwa sikai skur, ki khynnah skur wa kiwi de.
U Kyrmen hawa e yei klam da ong u wa ka sorkar neipor cheipor da yarap ko ya kiwa chong chnong nadooh ki kaam wa yatoh wa i chait i khiah, ka puræ puthi wa kiwi de deiwa ban joor katwon kordor u kreh chitom yow poi chakhmat ha ka puræ puthi.
Da ong u leh ya kani ka thong ym ye u poi khlem da ya krehlang ki bei ki pa deiwa pyrkhat ya ka mynried ki khon ki kti ki.
Ha kani ka sngi da em leh kam ka jooh ka yalang ha i jooh i thaw heiwa ka MLA ka Sutnga-Saipung, ka Santa Mary Shylla leh da saam Tablet ko cha ki khynnah.
Waroh da em 800 ngut ki khynnah na ki 13 tylli ki Higher Secondary School wa em ha East Jaiñtia Hills District wa da yoh ya kini ki Tablet kiwa da chna heitæ i rukom wow yarap ya kiwa lai puræ Arts, Science wa Commerce.
Discussion about this post