U MLA ka All India Trinamool Congress uwa man leh u Chief Whip ka Liang Pyrchah hapoh ka Yung Dorbar Chna Aiñ, u George B Lyngdoh da ong u wa ka sorkar jylla toh u klam che ko hawa yatoh wa i kaam khayi mooyong ha ka jylla.
Ini i klam u George toh hadien wa mih i jubab hapoh ka Yung Dorbar Rajya Sabha, wym em iwon iwon i tih mooyong na ka jylla Meghalaya kattu la soo snem. Wei ya ini da ong ynnin ka sngi da u Montri ka sorkar pyrdi uwa pait ya ka Minsitry of Coal, Mines wa Parliamentary Affairs, u Prahlad Joshi.
U MLA ka Trinamool da ong u wa man ko iyi iyi wa khyrngiat wow yoh sñiaw wa da jubab ha Parliament wym i pynmih mooyong ha ka jylla Meghalaya kattu la 4 snem, katwa i sakhiat won wa ki paidbah da yoo ki yei khayi ya u mooyong hadooh katni.
Da ong u wa ka sorkar jylla toh u klam che ko neibhah ya iyi wa da jubab wa da e ha Parliament toh iwa da pynkhreh da ka sorkar jylla, katwa iyi wa ka sorkar da jubab won ko ha Yung Dorbar Chna Aiñ ka jylla yaphær i.
Puræ leh: Ym em i tih mooyong hapoh Meghalaya la soo snem pyntip u Pralhad Joshi hapoh Parliament
