Ynne i miet ka 14 tarik heipor chwa wow dap 9:00 waje, kawi ka kynthai da kynthiar ko na yingkieñ Myntdu wa em ha u sarok Shillong-Jowai heiwa da mynsoo joor ko.
Katkam wa khana ki bru kiwa lai luti kiwa da sakhi ya ini wa jia, da ong ki wa kani ka bru da ku ko ha ka yingkieñ deiwa ksoh lang ko waka Phone kawa dang che ha kti wei syndet syndet da kynthiar ko cheiliang ka Pynthorneiñ.
Kani ka bru da haap ko pyn ha tre ka yingkieñ hi khlem dapoi cha um wei da kbai ko “Rap Rap” heiwa ki paidbah wa sñiaw da hiar ki wow lai yarap ka wei da pyntip ki leh cha ki pulit wei da antaad toh kawa dang hapoh 21-22 snem i rta.
Kani ka bru toh kawa da ood wa da kheiñ u tympong kheiñ bud loom ko wei neiliang ki paidbah da wanrah ki da ka tarpal yow rah ka cha i thaw wa em ha rood hi wei hawa kylli ya ka da ong ko wa tlær ko wei i chnong ko toh na Sohkymphor tangwa ym tip wei yi wan ko wei kammon poi ko cha kani ka thaw wei kiwa chong chnong ka Myntdu Pynthorneiñ leh ym tipmit ki ka.
Hadien wa slem ki pulit u poi kamjooh leh ka Ambulance, neiliang ki paidbah da rah noh ki ka cha sarok heiwa da em kawi ka kari pulit wa wan wei da pynthiah ka heini hapoh.
Kiwa chong chnong deiwa khuslai wa slem ware ka Ambulance u poi wei wa da chem chitom wow kit ka da ka kari pulit wei yow lait u jia iyi iyi ya ka, da sai ki da ka kari yong ki hi heiwa da kit ki ka cha Jowai Civil Hospital, Ialong.
U Waheh Chnong ka Myntdu Pynthorneiñ, u Purabor Lamare da khana u wa da pyntip ya oo yeini wa jia wei neiliang ka chnong leh da pyntip ko cha ki pulit wei da yaleh ki katwa ye yow yarap ya kani ka bru.
Discussion about this post