U Montri ka chnat Revenue & Disaster Management, u Kyrmen Shylla deilang wa u Montri ka chnat Animal Husbandry & Veterinary, u A.L. Hek, ynne da wan ki cha Jowai yow pynman yalang yow yaklam heiyatoh wa iwa chah ktah nei joor u slap ha kini ki sngi wa da lai ha East wa West Jaiñtia Hills kamjooh yow booddien yeiwa da e yarap.
Da ya emlang ha kani ka yalang wa ki DC ki ar District, u B.S. Sohliya wa u Abhilash Baranwal, u SDO ka Amlarem Civil Sub-Division, u Dr. Abhishek Saini, u M.B. Tongper ADC, Jowai, ka J. Kharpuri, ADC, Khliehriat, u S. Phanbuh wa u WK Kharbuli, Assistant Commissioner, Jowai, u Superintendent of Police, u Chemphang Syrti, u Dr. B. Langbang, BDO Thadlaskein C&RD Block wa ki heh ki chnat sorkar wei ya ka yalang da pynman ha Conference Room u Deputy Commissioner ha Jowai.
Neiliang u A.L. Hek da ong u wa i thong wa wan ki toh yow tip hadooh katwon chah ktah ki yung ki sem kamjooh ki luti syngkieñ na ini i joor slap wei wow pyntikna wa waroh kiwa chah ktah u yoh yarap ki hapoh 48 kynta wa jia ya ki deiwa pynemkaam da ka poisa kawa da em chwa khlem da pynslem.
Neiliang u Kyrmen Shylla da ban joor u yei emkaam wa ki chnat wa pait ya kini ki kaam toh u leh ki wut-wut yei kaam yong ki khlem da yang ya ki bru ka Disaster Management neibhah deiwa leh kamni daw smat u pynpoi yei yarap.
Neiliang ki DC da khana ki ya iwa chah kthah ha ki District yong ki heiwa da em ki sarok kamjooh ki yingkieñ kiwa chah ktah, da pyntip ki wa da em leh i oor khyndaw, i chah tympat ki chrot bordiñ wa kiwi de wei da leh smat ki wow e yarap cha kiwa chah ktah.
Hawa kheiñ yei chah ktah ki yung ki sem wa ki chnong ki thaw da man i iwa duna bha ha ki ar District wei ym em dooh yei mynsien bru ha West Jaintia Hills lait noh uwi uwi ha East Jaiñtia Hills District uwa khlaad nei chah ban khyndaw i yung heipor wa wan ka Cyclone Remal.
Da pyntip ki leh wa da booh da ka Quick Response Team ha ki District.
Discussion about this post