Katwa ka seiñ ki tre Truck wa kiwa yah Truck wa tip kam ka Meghalaya Commercial Truck Owners and Drivers Association, Jaiñtia Unit dang pteiñ ki yei yakhih khlem booh por nadooh ynnin ka 6 tarik harood u sarokbah NH-6 ha 7Mer, West Jaiñtia Hills District, deiwa synranlang ka Central Body wa kiwa na ki District waphær ka jylla, syndet syndet ynne i sngi da wan poi kawi ka Truck kit Coke kawa da lai pynyoo bor ryngkat i synran ka kari pulit yong ka Phramer Traffic Cell deiwa emlang u Officer In-charge.
Katkam wa khana kani seiñ wa em ha katai ka thaw, katai ka Truck toh kawa em Number ML-04D-3267 kawa mantre da u Nidamon Chullet uwa jooh man leh nachwa kam uwa yahkhmat hapoh ka seiñ yah Truck wa ki tre Truck.
Kiwa yahkhmat ka seiñ wa kynthup ya u Smen Khyndiat, Adviser ka Meghalaya Commercial Truck Owners and Drivers Association, Jaiñtia Unit, u Shanborlang Suchiang, Secretary, neitæ u Biangshwa Shylla uwa yahkhmat ka Jaiñtia Hills Truck Owner and Driver Association deilang wa ki dkhot da beiñ joor ki yeini wa emkti ki pulit wow synran ya katai ka Truck kit Coke wot hawa ka yakhih dang lai ko neibynta wow yoh kamailang wei yow im para kiwa yah Truck wa ki tre Truck, ymtoh wow yakhi du yow myntoi uwi ar.
Da khana ki wa em hi kawi ar ki kari wa da yoh ksoh ki heiwa da phah uiñ biang ki tangwa kani ka kari u Nidamon Chullet da thombor ko wot hawa da ki spah ngut kiwa yah wa ki tre Truck dang em ki ha sarok wow yakhih yaksaaid ya ki phang dawa na ki kharkhana Coke hawa yatoh wa i dor i mur ka bai kit.
Katkam ka khubor wa da yoh won rap hadien na kiwa yahkhmat kani ka seiñ, da ong wa hadien wa miet, da wan biang ki Truck kiwa da chah pynuiñ deiwa thombor wei wow lai naphang khlem da kheiñ de ya ki bru wa em ha sarok heiwa da em kiwa da jan chah yooh leh.
Kamtæ ki dkhot ka seiñ wa em ha katai ka thaw pynman yakhih da kdong ki ya kini ki bru.
Discussion about this post