Kam chibynta i lehkmen ya ka World Blood Donor Day 2025 hajrong ka phang “Give Blood Give Hope Together We Save Lives”, ka Jowai Civil Hospital Blood Centre ynne ka sngi da pynkup burom ko ya ki kynhun seiñ waphær waphær kiwa jooh kyrchaan ya ka Blood Bank neipor cheipor lyngba i pteiñ yong ki wow e sñiawbha dei snaam, kawa man leh ka bynta wa kongsan wow pynim ya ki para bru wa em ha kyndian i im lym yoh snaam ki.
Ha ka yalang wa pynlai da u Dr. D. Lakiang, Medical Superintendent, Jowai Civil Hospital, u Add. SP ka West Jaiñtia Hills District, u Ishan Gupta, IPS da man u kam u kongsan, u Kingshok Kamal Bora, Co-ordinator CSR Department, Star Cement kam u symbood kongsan.
U Add. SP hawa e yei klam da pynkynmoo u wa wot ka yung ka sem yong oo leh toh kiwa dadep maad yei emkaam snaam smat wei nadooh itæ i por sdang u wow sñiawthooh yei kordor ka Blood Bank ha ka imlang sahlang.
Da ong u wa neibynta u ku ka jylla wa ka ri, ymtoh u randien nei lai e snaam sñiawbha ha kam kini ki Blood Centre, kamtæ kitu kiwa biang hei bor i doh i pran wei chait khiah toh u lai mih bait ki chakhmat wow e sñiawbha dei snaam. Neibhah ym em de deiwi tawon i chakri wa rap khroo lait nei e snaam sñiawbha.
Wei kawi ka bynta wa yoosuk u hapoh ka jylla toh i rukom im wei yajan ki bru hapoh ki chnong ki thaw khamtam hawa em kiwa maad yei chitom saja, iwa yaphær bha na ka thaw wa oo wan u.
Heijooh i por wa man leh ka thaw wa yoosuk i man i long ka ramaw næ ka soodong sookun.
Neitæ hawa kynmoo u ya ki para mynsien bru wa da dooh noh yei im hei jia wa sñiawsih nei hap ka lieñsuiñ ka Air India ha kini ki kajiak sngi, kyntu haroh u ya waroh wow yieñ suki chi minit kam ka dak i sñiawlem ya ki.
Chwa ini da yoh i klam na ka Dr. I. Khyriem, Senior Medical & Health Officer, In-change Jowai Civil Hospital Blood Centre.
Hadien ka yalang da em i pteiñ e snaam sñiawbha da ki dkhot yong ki kynhun waphær waphær.
Discussion about this post