U khynroo wa em i duna hei bor pyrkhat pyrdaiñ uwa na ka chnong Sohmynting, West Jaiñtia Hills District uwa da wiar nadooh i janmiet ka 13 tarik uni u bnai da chem ya oo ynne ka 15 tarik na chnong Rngad, East Jaiñtia Hills District.
I ye u chem ya uni u khynroo toh hadien wa em ki bru na ka chnong Moolamanoh, East Jaiñtia Hills District wa da Phone pyntip cha kiwa ha-yung ha-sem u manda yoo ki ya ka khubor wa da pynmih ha u Wyrta wa da yoo ki oo ha chnong Rngad kamwa chi kynta chwa.
Chwa ini, hei pyrchang ki paidbah ka chnong Sohmynting wow thooh u booddien yong chnong ya oo, ynne ka sngi da chem ki lyngba ki CCTV Camera ha Ialong Toll Gate wa ha Phramer wa lai bait u dei kjat heipor pyrdi synyaaw tymbood u sarok cheiliang East Jaiñtia.
Neitæ da lai e FIR ki ha Jowai Police Station wei da pyntip paidbah leh lyngba u Wyrta deiwa e lang i Phone Number yow pyntip ki bru.
Kamtæ du hadien kattu katni kynta wa pynmih khubor, ki bru kiwa na Moolamanoh kiwa uiñ-ke cha chnong Rngad da yoo ki oo wei da Phone pyntip wot ki wut wut cha kiwa ha-yung yong oo kiwa da wanlang wow thooh biang oo neibhah wa da rap chimpor u poi wei da chem ki oo hajan kawi ka thaw wa em um heipor wa dang sait khmat u deiwa yarap thooh lang kiwa chong chnong ka Rngad.
Kam wow pynkynmoo wa uni u khynroo da tip pyrtuid kam u Kner Pohleng uwa em 21 snem i rta uwa jooh khut maya kam u Maduh, uwa man leh u khon ka Josphin Pohleng wa u Kyrchan Dkhar.
Heiyatoh wa da ye u chem biang ya oo, neiliang ka yung ka sem dap ki dei sñiawngooh ya ki paidbah ka chnong Sohmynting kiwa da leh chitom u thooh yonglang, sñiawngooh ki leh ya ka chnong Rngad nadooh u waheh chnong, ki dkhot chnong, ki paidbah, ki bru wa yarap u pynyoo CCTV Camera, khamtam ya ki bru wa Phone pyntip cha ka yung ka sem kiwa na ka chnong Moolamanoh.
Puræ leh: Wiar u khynroo uwa na ka chnong Sohmynting
Discussion about this post