Ka mukotduma PIL wa da yaleh da u Tenny Dard M. Marak heiyatoh wa i krehkaam ki Weighbridge wa em hapoh Meghalaya, da chong bichaar biang ka da ka High Court ka Meghalaya heiwa uwa yaleh mutduma deilang u muktiar yong oo da ong ki wym em ki Weighbridge ha ki thaw wa emkaam wei da em leh i leh kaam pyrchah aiñ da ki bru sorkar ha ki 28 tylli ki Weighbridge wa pynlai da ka sorkar hi.
Da ong ki wa ini iwa leh kiwa kreh sorkar toh deiwa e laad ya ki Truck wa kit palatpood wow lai ki khlem da em wa ksoh ki iwa da wanrah yei dooh nong wa hadooh Rs. 640 klur ya ka sorkar.
Ka High Court ha ka 16 tarik u Naisan 2025 da phah ko ya uwa yaleh mukotduma wow jubab ya ka Report wa da e da ka sorkar heiyatoh wei lai leh Inspection ya ki 24 tylli ki Weighbridge heiwa da chem wym em ki Truck wa kit palatpood wa yoh u lai luti.
Neiliang kiwa yaleh mukotduma da jubab ki ya kani ka Report deiwa ong wym em ki Weighbridge ha ki thaw wa emkaam, wei da em leh kiwa boon ki wym ye wow thaw-khia katwon kit kini ki Truck wei ki mar wa lai cha Bangladesh toh ki wym em tang u thaw khia deiwa toh rukom.
Da e nongmuna leh wa ka Weighbridge wa em ha Chaipani, Dalu toh kawa ye u thaw-khia du ya ki Truck wa em 10 chaka wei ki kari won wa psiah cha India na Bhutan toh kiwa em 12 chaka ki wym ye u thaw-khia.
Neiliang u muktiar ka sorkar da ong u wa heiyatoh wa kini ki kari wa wan na baar ri da leh katkam i ya sñiawthooh katkam ka Treaty wa da yasoi hapyrdi ki le ri iwa mut wym ye ware u leh pyrchah ya ki.
Neiliang ka High Court da ong ko wa ini i dooh nong ka sorkar toh i bynta wa emkaam bha kani ka mukotduma, kamtæ da phah ya u Principal Secretary, Transport Department wow pait bniah yeini wa jubab kiwa yaleh mukotduma chwa ka 5 tarik u Naiynñiaw, 2025 wei lada ini i pynbaad toh iwa sakhiat wow leh yeiwa emkaam.
Discussion about this post