I thombor wei i pyndik ki Karbi ya ki Pnar ha Lapangap, West Jaiñtia Hills dang pteiñ i hadooh ynne heiwa u waheh chnong ka Lapangap, u Deibormi Lyngdoh da ong u wa ki Karbi chirup wa ka Karbi Anglong Autonomous Council (KAAC) da wan pynjulor ki ya ki loom ka chnong nadooh ka 10 tarik uni u bnai wow thung dieñ ha Loom Umchyrngan iwa da pynsñiawsih bha ya ka dorbar chnong neibhah ym em u paan bor næ pyntip ki cha ka chnong.
Da khana u wa da pyntip chaphang ini ya cha ki bor District ka West Jaiñtia Hills kiwa da chimkhia yeini wei hadien wa yoo wym em mano ki Karbi, kamtæ kam ka dak wow pynyoo wa ini i thaw toh i hok yong ki, da rai wow mih paidbah ha ka 25 tarik chirup i em ki seiñbhalang, ka Synjuk Waheh Chnong Ri Jaiñtia wa kiwi wow pynsangeh yeini i kreh ka KAAC.
Da khana u leh wa hadien wa liwan ki na ini i thaw ha ka 25 tarik, ki Karbi da thombor ki ya ki hali deiwa phut ya u kba na ki hali ki Pnar wei da thang ki leh ya ki kattu katni ki trep.
Chooh chooh da ong u wa ha ka 27 tarik da yachem wa u Dy. CM ka jylla, u Prestone Tynsong wow paan yarap yow yada ya ki warep neibhah hadooh ynne ka sngi dang langam ki hali neibhah ym em wa nood de u lai rep wei lada jia ha kam kini ki por wym yoh u lai hali khamtam hadien wa dep thung kba, waroh daw man iwa sepai.
Kamtæ da kyrpaad u ya ka sorkar wow phah smat ya ki pulit cha ini i thaw wa em ki hali yong ki.
Heijooh i por da ong u wa wot hadien ka 25 tarik, ki Karbi ympu pynlait ki ya ini i thaw weiwa yoo lakam wa em i thmu wow chna iyi iyi ha ini i thaw wei ye leh u man wow chna ki ya ka ktem ki chipai ha ini i thaw.
U Deimon da kyrpaad u ya ki bor District ka West Jaiñtia Hills wow lai pait bniah ha ini i thaw wei lada ieh kamtai daw mih iwon iwon i jia wa sñiawsih hapyrdi kiwa chong wa sah ha ka thaaiñ.
Da pyntip u leh wa manda em ki warep wa lai cha ki hali da chah siat watur ki ha ki bru na ki khloo wei ini pynman i ya ki warep wow tieñ ki.
Discussion about this post