Ka seiñ HITO hadien wa da booh ko da ka RTI ha JHADC yow kylli kiyi wa pynlai ya ka Weighbridge Cum Forest Check Point ka Council wa em ha Sonapur wei lada thung ya u Sevenborn Tang kam u bru namo u Agent wow pynkrehkaam ya kani ka khyrdop wei kamjooh lada yoh bor na ka Ministry of Road Transport & Highway wow booh ya kani ka khyrdop.
Neiliang ka JHADC da e jubab ko wa ka Council ym em pynkrehkaam ko ya kawon kawon ka Weighbridge hapoh u pood u ang ko wei ym em thung ko leh ya uwon uwon u bru wow man kam ka u Agent yow pynkrehkaam ya ka kawon kawon ka thaw khrong dan wa tip kam ka Weighbridge Cum Forest Check Point.
Da pyntip leh wa ym em paan NOC na ka Ministry of Road Transport & Highway neibhah wym em pynkrehkaam ya ki Weighbridge.
Hadien wa yoh yein i jubab na ka JHADC, neiliang ka HITO ha ka 5 tarik uni u bnai da lai booh FIR ko ha u SP ka East Jaiñtia Hills District pyrchah ya kani ka Weighbridge Cum Forest Check Point ka JHADC kawa em ha Sonapur kawa da khrong poisa hei pyrtuid ka JHADC wot hawa ka Council da e jubab ko ha ka RTI wym em pynkrehkaam wei ym em e bor ya uwon uwon wow pynlai ya kani ka khyrdop.
Ha kani ka FIR da ong wa u Sevenborn Tang da pynlai u leh ya ar tylli ki khyrdop wa man pyrchah ya ka aiñ deiwa kam wa man u kam u Agent ka JHADC wei ym ye u pynsakhiat yeini da ki kot ki sla wa biang khamtam wym em leh ka NOC na ka Ministry of Road Transport & Highway ka ri India kamjooh na ka chnat PWD ka jylla.
Kamtæ da dawa ya ki bor ka aiñ wow leh yeiwa emkaam pyrchah ya kiwa pynlai ya kani ka khyrdop pyrchah ya ka aiñ.
Ya kani ka FIR da soi da u Wanbun N. Dkhar, General Secretary HITO Central Body, u Lawyerson War, Co-Founder ka HITO Central Body wa u Deibormi Rymbai, President ka HITO East Jaiñtia.
Discussion about this post