Ka seiñ JSU Central Body deilang ka JSU Syndai Unit da dawa ki wow khyndang ya kiwa chong chnong pyrchah aiñ ha ka chnong Lakroh kamjooh wow pyndam noh yei pyrtuid ki napoh ka Electoral Roll wei wow kær noh smat ya u pood wa ka Bangladesh khamtam hadien wa chah dat kiwa chong chnong ka Hawai Sutnga ha kiwa chong chnong ka Lakroh kiwa man ki chnong wa haap hapoh ka Amlarem Sub-Division ka West Jaiñtia Hills District.
Ka seiñ da ong ko wa ha Lakroh 95% kiwa chong chnong toh kiwa man kam ki Non-Tribal kiwa da wan chong chnong pyrchah ya ka aiñ katwa ki jaitbru tre ri da em ki sa du 5% donhi.
Kini ki bru da man ki kam kiwa chong chnong wa pura hadien wa u waheh chnong warim da e u da ki Temporary Stay Certificate wei kini ki bru da chim kabu ki wow chna yung dei khyndaw bilat hapoh kani ka chnong kawa dang haap hapoh ka Elaka Satpator khlem da mantre yei khyndaw.
Chooh chooh da ong wa waroh tip ki wa ya kini da em wa e EPIC, Aadhaar yow yoh Vote Bank, kamtæ da dawa na ka Election Commission wa ki bor District wow pyndooh noh yei pyrtuid kini ki bru napoh ka Electoral Roll.
Ka seiñ da kdaw ko leh wa da chna ya ka Mandir ha Lakroh wot hadien wa u Dolloi kamjooh u SDO warim da phah u wym toh u chna nadooh u snem 2024 tangwa kattæ da chem wa dadep wow chna ya kani ka Mandir.
Iwa da pynchrai chooh chooh ya ka seiñ toh wa kini kiwa wan chong chnong pyrchah aiñ da yoh ki leh ya ka MGNREGA Job Card hadooh wow chna yung hapoh ka PMAY Scheme. Wei yeini leh toh u pynman da ka takit yow chem tre kammon da yoh myntoi ki kamni.
Hajrong ini waroh da ong wa toh u pynkrehkaam ya ka Meghalaya Residents Safety and Security Act (MRSSA) deilang ka ILP khlem da pynslem de.
Heiyatoh won wa iwa chah dat kiwa na Hawai Suntga, da dawa kem wei pynchitom ya kiwa emkti kamjooh wow pyntikna wa chngaaiñ i im deilang i lai i wan kiwa chong chnong.
Discussion about this post