Ka Hynniewtrep National Youth Federation (HNYF) East Jaintia Zone ynne ka sngi da lai ko wow booh dorkhat ha u Deputy Commissioner yong ka East Jaiñtia Hills District yow pynsñiaw yei pyrchah joor yei thmu pynman Public Hearing ka M/s Shree Cement Limited kawa da booh wow pynman ha ka 22 tarik u May 2026 ha Lum Syrman kawa haap hapoh ka chnong Shnongrim, Elaka Nongkhlieh.
Ka seiñ da pyrchah joor ko neidaw wa kani ka thaw tih moochuni toh kawa daw ktah joor ya ka wah Liteiñ kawa em chiboon ki jait dohum wei man ko leh ka tyllong um ya ki paidbah ka chnong wei daw pynjakhlia leh ya ka um da ki dawai (Chemical) kiwa daw mih na kani ka karkhana.
Da ong leh wa kani ka thaw toh kawa sboh bha tangwa deiwa wan kani ka Cement Factory daw ktah ko yeini waroh khamtam i khyndaw wa pynemkaam yow rep u riang najrong i pynmih yei laphooh iwa daw ktah ya ka la’ær wa yei chait i khiah nadooh ki khynnah hadooh ki tymmen.
Daw ktah leh wot ya ki sim, ki doh wa ki mrad khloo wa em cha kani ka thaw wei i ood i thai ki kor wa pynemkaam daw pynkulmar ko yei imsuk wei chongsuk kiwa chong chnong.
Ka seiñ da ong ko wa hadooh kattæ ym pu em yoo ya kawon kawon ka karkhana kawa wanrah yei myntoi ya ki tre chnong tangwa da wan ki du wow kamai spah.
Discussion about this post