Pyndem ka Star Cement ha ka JAC | Dang pteiñ ka yakhih pyrchah ya ka Dalmia wa ya ki Bulker Truck

Hadien i maham yong ka Joint Action Committee (JAC) kawa kynthup ya ka East Jaintia Hills Truck Owner and Transporter Association (EJHTOTA) wa ka Jaintia Hills Truck Owners’ Association (JHTOA) wow nang pynjoor chooh chooh neini chakhmat ya ka yakhih wa khlem booh por pyrchah ya ka Star Cement wa ka Dalmia Cement hajrong i wym mano ki ya ki mat dawa wa kynthup sa i phah pyndooh pyndam ya waroh ki Bulker Truck na waroh ki karkhana Cement ha East Jaiñtia Hills District, neiliang u Deputy Commissioner, East Jaintia Hills District, ynnin ka sngi da khut u ya ka JAC wa ya kiwa yakhmat yong ka Star Cement wa yong ka Dalmia Cement cha yalang kawa da pynman ha Conference Hall yong ka Office yong oo.

Ha katai ka yalang kawa da pynlai da u Deputy Commissioner hi, u Manish Kumar hei emlang u Superintendent of Police, ka District, u Vivekanand Singh heiwa da chimbynta da kiwa yahkhmat yong ka Star Cement wa ka Dalmia Cement chirup wa kiwa yakhmat wa ki dkhot yong ka JAC.

Ka Star Cement da hap noh ko wow pyndem hakhmat ka JAC deiwa kohngooh wei kular wow a Trip (Load) noh ya ki Truck yong ka JAC hadooh 9 Trip ha ka chi sngi. Katai ka 9 Trip toh mar 9 Trip ya ka EJHTOTA wa JHTOA wei kini kynthup ki ya ka 7 Trip deiwa kit Cement namo Clinker ka wow lai cha ki thaaiñ 13 Mer wa Sonapur, wei kamjooh leh sa ya ka 2 Trip nawon du wow kit Cement suda ki wow lai cha ki thaaiñ Silchar.

Heijooh i por ka Star Cement da kular haroh ko wa nadooh neini chakhmat u pynthikna ko wym toh de u em i pynyang slem ya ki Truck yong ka JAC, lada hei thaw thap namo hei thaaw pynhaap mar.

Related posts

Ki daw wa yoh jamin ka Sonam Raghuvanshi

April 28, 2026

Pyrchah ka HNYF ya ka Public Hearing ka Shree Cement deiwa ong wym em yoo i myntoi deiwa wan kini ki karkhana

April 28, 2026

Katwa neiliang yong ka Dalmia Cement nawon ha katai ka yalang ym pu ye ko wow e ya kawon kawon ka rai heiyatoh wa ki mat dawa yong ka JAC.

Kamtæ heiyatoh wa ka Star Cement katwa da ap da sñiaw wei ksoh ko ya ki mat dawa yong ka JAC, ya ki Truck kit Cement wa Clinker yong ka waroh, ka JAC ha ka General Meeting yong ka kawa da pynman jhan ynne ka sngi, da rai ko wow pynlait noh ya ki nadooh myntu ka sngi.

Heiyatoh won wa ka Dalmia Cement, neibhah wym pu ye ko u e jubab ya ki mat dawa yong ka JAC, katwa kamtæ ha katai ka jooh ka yalang yong ka JAC, da rai ko wow dang pteiñ bait yei yakhih yong ka hei wow dang ksoh wei u pynuiñ chei thaw wa wan ya waroh ki Truck kit Cement kamjooh ki Clinker kiwa toh yong ka Dalmia Cement. Ha katai ka jooh ka yalang yong ka JAC, da chim haroh yei rai wa lada jia wa ka Dalmia Cement ym bood ym mano ko ya ki mat dawa yong ka JAC, u nang pynjoor chooh chooh ko yeini i yakhih yong ka neini chakhmat.

Heiyatoh won wa ki Bulker Truck wa da pynemkaam da waroh ki karkhana pynmih khyndaw-bilat kiwa em ha East Jaiñtia Hills, ka JAC ha katai ka jooh ka yalang da rai ko wow dang pteiñ bait u paitsiar, u ksoh wei wow pyndong ya ki cheitaw wa wan ki lada dang chem ya ki.

Da ong leh wa heiyatoh wa kini ki jait Truck lada ym pyndooh pyndam noh ya ki chisiendon, ka JAC daw leh ko deiwa khor pyrchah ya ki neini chakhmat.