Ka Krishi Vigyan Kendra Jaiñtia Hills ha ka 15 tarik da wai ko ya ka Office krehkaam wa pura yong ka kawa em ha Wahiajer, West Jaiñtia Hills District wei ha kani ka sngi da pynman ko leh yei pynsñiawthooh paidbah cha ki warep heiyatoh wa ka Project TDC-NICRA (Technology Demonstration Component – National Innovations on Climate Resilient Agriculture), itæ wow sikai ya ki warep lyngba ki buit stat thymme kammon u yada ya ki mar rep næ u pynkhlan yei rep i riang pyrchah yei kylla ka suiñbneiñ.
Ha kani ka sngi u Symbood Montri Rangbah ka sorkar jylla, u Sniawbhalang Dhar da man u kam u kongsan hei emlang ka M. Dkhar, Director of Agriculture (R&T) Deparment of Agriculture and Farmers Welfare ka sorkar Meghalaya, u S. Rani, Director of Agriculture, Deparment of Agriculture and Farmers Welfare ka sorkar Meghalaya, u Dr. G. Pratibha PL, TDC-NICRA, ICAR-CRIDA, Hyderabad, u Dr. AK Mohanty Director ICAR-ATARI, Zone VII Umiam, ka Dr. Larika M Challam, Former Head KVK Jaiñtia Hills, u Dr. Dayohimi Rymbai, Head KVK Jaiñtia Hills, u Dr. P.K. Pathak, PL-NICRA New Head wa kiwi najrong ki paaid warep.
U Sniawbhalang Dhar hawa klam ong u haka juk katni i tip i stat man kawa emkaam ha waroh ki liang na itæ i daw ka sorkar da wanrah ko ya ki thaw e sikai wa kyrpang heiyatoh wa i rep i riang khnang yow man ki warep u rep ki dei tip i stat neibynta wow yoh nong wei yow dap yow biang.
Lyngba i em kam kani ka thaw e sikai ki warep u tip ki ya u jait symbe wa yahaap wa i man i long ka thaw, kamjooh leh uwa yahaap ha kayi ka samoi, neibhah ymtoh waroh u symbe toh uwa hoi ha waroh ki thaw, wei ymtoh i jooh i man ka suiñbneiñ ha waroh ki thaw.
Ong haroh u wa neiliang ka sorkar India chirup i yakrehlang ka sorkar jylla da yaleh ko u pynlut poisa da ki spah klur neibynta ki warep, wei ka sorkar jylla hapoh i yahkhmat ka MDA da yaleh ko u wanrah boon ki Mission neibynta ki paidbah nadooh ka YES Meghalaya, ka Hello Meghalaya, ka Focus, Prime Hub wa kiwi najrong wa e Subsidy leh 50% ya ki warep u thied kari Pickup yow yoh ki u pynemkaam hawa kit mar rep.
Neitæ i yarap wa Rs. 5000 samen cha ki warep yow yoh thied symbe, wei ong u ha ka 15 tarik oo wa u Chief Minister, u Conrad Sangma wa u Dy. CM, u Prestone Tynsong dang yaklam ki yow pynboon chooh chooh i yarap cha ki warep.
Ong haroh u wa ka sorkar da wanrah ko ki laad yarap lyngba ki Scheme hawa chah ktah ki mar rep, neitæ yow pynlai yaaw ya ki mar da em ka Marketing Board haka chnat i rep i riang khnang yow lait nei chah ksih dor ki mar rep.
Kamtæ kyntu u ya ki warep wow wan mih yachem yumut wa ki sahep khnang yow jop ki ha i rep i riang.
“Lada i kam ki bru ym ñiawkor i ya kawon kawon ka kaam wa kreh i, ym man i ki bru wa jop, kawon kawon ka kaam hakhmat ka sorkar man kawa kordor lut wym ym em kheiñ poh kawi wot leh,” da ong u Sniawbhalang Dhar.
Da ong u leh lada u bru man uwa mahajon katwon katwon leh ym ye u wow im khlem u khian u dai næ uwa dooh wa duk khamtam ki warep.
Wei boon leh ki warep dei tip i stat da man ki kiwa mahajon kamtæ ymtoh u kheiñke yei rep i riang.
Khut wei kyntu haroh u wow man ki bru wa yakrehlang ha kawon kawon ka bynta deiwa kiar nei ya bichni.
Ha kani ka sngi u Symbood Montri Rangbah da e kti haroh u ka kor Power Tiller cha ka Blossom Nongrum kawa naka chnong Niriang hajrong i yoh ko yei naam Best NICRA Farmer.
Wei hawa pdiang ya kani ka kor Power Tiller, ka Blossom Nongrum da e khublei ko ya ka chnat i rep i riang, wei kyntu ko leh ya ki para warep wow ya kreh chitom ki hei kaam rep.
Heijooh i por kyntu haroh ko ya ki manbei manpa wow pynchlur ya ki khon yow kyruiñ ki cha i rep i riang hanla toh kiwa da stat hei puræ puthi leh, neibhah ha kini ki sngi u yang bait yei kreh sorkar ymtoh iwa suk.
Wei lada yah luti ya ki khon ha i rep ym dooh khih de ki neibhah da ye ki u yieñ hei yong ki hi i kjat, heijooh i por leh wa i rep i riang toh u budloom hei im wa man-ka-sngi ki bru.
Discussion about this post