Ka Khasi Students’ Union (KSU), South West Border Circle, da e yaroh wei sñiawngooh ko ya u Executive Engineer (EE) deilang u Sub-Divisional Officer (SDO) ka Public Works Department (Roads), Khliehriat Division, kiwa da chimkhia smat yeiwa kyrpaad ka seiñ wow wan pait yei chah ktah u sarok Borghat–Sonapur uwa dang dep chna wot nei oor i kynroh, i oor khyndaw wei yei wym em i chna ki laad wow yada.
Neiliang u Executive Engineer deilang kiwi ki sahep da wan ki cha kani ka thaw pyn ha ka 3 tarik uni u bnai khlem pynslem heiwa da pynman da ka Joint Inspection deiwa emlang ki dkhot ka seiñ heiwa da lai pait ya waroh ki bynta wa sih kiwa da chah ktah nei oor khyndaw, i haap moo wei i bynta wa sih u sarok nei joor u slap ha kini ki sngi khamtam ha chnong Kwator chadooh Wahprang wa da em boon ki thlu ha pyrdi sarok.
Ki sahep ka PWD da pyntikna ki wow pynkhooid noh yei khyndaw, ki moo wa kiwi de kiwa da kah ya u sarok wei wow pynchna leh ya ki bynta u sarok wa da sih mar ya rang i suiñbneiñ deiwa booh leh ki Side Drain, Catch Water Drain, Retaining Wall, ka yingkieñ wa kiwi de ki laad yada kiwa dadep pynkhreh wei da phah ki Proposal cha ka sorkar yow e ko ya ka poisa wei mar ya yoh ka poisa daw sdang chna noh yeiwa emkaam.
Ka seiñ da kyrpaad ko leh ya ka MLA ka thaaiñ, ka Santa Mary Shylla wow nang pteiñ wei chimkhia ko wow booddien yeini i kaam yow pyntikna wa yoh ya ka poisa yow chna ya ini waroh wa da mang ka PWD.
Discussion about this post