Pynyap kawi ya u kurim wei tlep ko yei metyap ha thaw sum | Pyntip ko cha ki pulit wa wiar u

Ki pulit ka Agra ynnin da kem ki ya kawi ka bru kawa da chah pynbaad wa pynyap ko ya u kurim hi ko wei da murieh ko yei metyap ha thaw sum wei hadien ini lai booh ujor ko ha ki pulit wa wiar u.

Yei metyap u Surendra Sharma (45 snem), uwa da wiar la kamwa 45 sngi da chem biang da ki pulit hadien wa tih ya ka kamra sum ha i yung wa sah u deilang ka kurim u ha Renuka Dham Colony iwa dang haap hapoh ka Sikandra Police Station.

Neiliang ka Assistant Commissioner of Police, ka Amisha da ong ko wa u Surendra da suba wa chah pynyap u pyn ha ka kurim u kawa da tlep oo hapoh thaw sum wei da tymmoh ko dei khyndaw bilat yow murieh.

Kani ka heh pulit da ong ko wa hadien wa ka kurim uni u bru kawa tip kam ka Ruby Sharma chah kylli takit ko yeini wa wiar u kurim ko da pynsuba ya ki pulit wa emkti ko ha ini i kaam neibhah ong ko deiwi chisien wei chibet won deiwi wei kiwa emyatoh won ko ong ki deiwi.

Ki pulit da kem ki ya ka Ruby yow chemtre yei daw wa jia ini hadooh wow pynyap ko ya u kurim ko.

Kiwa sah janyung da khana ki wa kini ki chi kurim toh kiwa khlan bha u yamai wei da sah ki ha kani ka thaw la kamwa 9 snem haroh.

Related posts

Pynkhreh u Vaibhav wow tyngkheiñ ya ka Record u Sachin

July 5, 2026

Chah maham u Modi chwa wow lai cha Australia

July 5, 2026

Ka Ruby da booh ko ya ka ujor wa wiar u kurim ko ha ka 26-05-26 wei i takit ki pulit da chem wa u kurim ko toh u wym em khih, uwa khlan dih kiad wei uwa dawa poisa na ka yow thied kiad wei lada ym e poisa ko da jooh dat u ka.

Kini ki ar ngut toh kiwa da ya bia la 16 snem wei em ki ar ngut ki khon kynthai. Ka poisa wa im ki toh na ka Pension u pa u Surendra uwa da khlaad noh wei ya kani leh toh kawa da yabhah wa u payu u uwa tip kam u Anil Sharma.

Neiliang ki pulit da antaad ki wa da chah pynyap u Surendra ha ka kurim u ha ka 18-05-26 heiwa ka Ruby da khleh ko deilang chiboon ki dawai yoh thiah ha i Kheer iwa da e ko wow baam u.

Ki khon ki leh ym em suba ki iyi iyi neibhah da jooh yoo ki yei thiah yap kiad u pa ki da ki boon kynta hadien wa dep dih u.

Ki pulit dang yang ki ya ka Post-Mortem Report yow tip i daw wa yap u Surendra.

Da chem leh wa ka Ruby da lai booh ko ya ki khon ko cha yung u payu u Surendra ha ka sngi wa bood heiwa da yoh laad ko wow tih ya ka thaw sum yow murieh ya u kurim ko.

U payu u Surendra da sdang u wow suba wa em iyi ræ iyi neibhah em bait wa sai poisa deiwa pynemkaam da ka Debit Card u Surendra wot hadien wa da wiar u la 45 sngi, kamtæ da lai pyntip u cha ki pulit.

Ki pulit dang pynman ki yei takit boi em kiwa yarap ya ka Ruby wow leh ko yeini i kaam.