Ka Khasi Students’ Union-Central Executive Council ha 4 tarik uni u bnai da lai hiar ko cha Domiasiat wow yachem wa kiwa ha-yung ha-sem ka Spility Lyngdoh Langrin (Baam Kwai ha Dwar u Blai) wa kiwa chong chnong yow pynskem ya ka yurim wow pyrchah yei tih ya u Uranium na kani ka thaw.
Ka seiñ chwa ini ha ka 1 tarik da yachem ko wa u Chief Minister ka jylla, u Conrad Sangma yow e dorkhat heiwa kawi na ki kyndon toh wym e laad u thih Uranium heiwa oo leh da kular u wym em laad.
Tangwa ka seiñ da chem ko wa em ki heh spah kiwa da wan hiar cha ki chnong wa marjan ha Domiasiat heiwa da thied thaw ki hei dor wa heh wei uwi na ki heh spah toh u MLA warim na Ri-Bhoi, wei ka seiñ da tikna ko wa i wan thied kini ki heh spah toh yow dai won cha ka UCIL yow tih Uranium wei ini da yoo kamwa da jia ha East Jaiñtia Hills wa ki Cement Company.
Ka seiñ da ong ko leh wa em i wan ki bru wa jooh emlang wa ka sorkar ha kini ki sngi ki tayaaw yow pynsñiawthooh bakla ya kiwa ha-yung ha-sem ka Spility yow dai noh yei thaw yow e laad u tih Uranium.
Chooh chooh da ong wa da chah phah hajir ya kiwa kreh wow yada ya ka rymaw kiwa man leh ki dkhot ka seiñ ha ka Central Bureau of Investigation (CBI) wa ka National Investigation Agency (NIA) yow maham wei wow pynytieñ ya ki wym toh u tuklar yei kaam tih Uranium.
Da khang leh ya kiwa na baar ri dei wym e VISA ya ki yow pyrchah yei tih Uranium kamjooh wow rah ya kani ka phang cha United Nation (UN) wa kiwi de ki rynsan ka pyrthai.
Ka seiñ da chem ko leh wa ka Geological Survey of India (GSI) da paan bor ko wow leh Survey ya ki mar pohkhyndaw wei da tip tikna ka seiñ wa yeini toh neidaw u Uranium tangwa da sepai hadien wa khut yaklam ka Deputy Commissioner ka South West Khasi Hills District ha ka 18-06-26 heiwa ka GSI ym ye ko wow jubab yeiwa da kylli kiwa yahkhmat ka KSU-South West Khasi Hills District, kamtæ ka GSI da hap ko wow kynran dien noh.
Hajrong ini ka seiñ da dawa ko na ka sorkar Meghalaya wa manda chong dorbar wow chna da ka aiñ wa kiwa thied thaw ha ki thaaiñ wa em Uranium wym chah wow dai yei thaw cha ki Company wa tih Uranium.
Da dawa leh na waroh ki District Council, kitæ ka Khasi Hills Autonomous District Council (KHADC), ka Jaiñtia Hills Autonomous District Council (JHADC) wa ka Garo Hills Autonomous District Council (GHADC) wow wanrah da ka aiñ næ ka Resolution yow khang yeini i jooh.
Khaddooh da dawa wow wanrah ka roi ka paar ha thaaiñ Domíasiat wa kiwi ki chnong wa em marjan deiwa pynbiang ka um dih, i bordiñ, ki sarok, ki skur, ki thaw sumaar wa kiwi kiwi, neibhah wa waroh chi kattu ka sorkar da ieh beiñ ko ya kini ki chnong neidaw wa pyrchah ki wow tih Uranium.
Discussion about this post