Da wai ka dwar ya u Paul Lyngdoh uwa daw baam smai kam u Montri sorkar myntu ka sngi

I pna hiar chuki hi u Metbah Lyngdoh da wai ko ya ka dwar warr neibynta u Paul Lyngdoh wow chimkti biang ya ka chuki Montri ha ka sorkar MDA-II. Katkam ka tyllong khubor da ong wa u Paul Lyngdoh u chim smai u kam u Montri myntu ka sngi heipor janmiet.

Da yoh leh ka khubor wa u Paul ye u wow yoh ya ka chnat wa kongsan wa kynthup ya ka chnat Tourism kawa da jooh ksoh u nachwa khamtam hadien wa ka sorkar da maad ko ya kiwa pyrchah ya ka Shillong Ropeway.

Kam wow pynkynmoo wa ha ka 31 tarik u Naichiphaw, u President wei u MLA wa sah samen yong ka United Democratic Party (UDP), u Metbah Lyngdoh da pynbna u hiar chuki noh u deiwa kdaw wa man ko na ki daw samen wei hadien wa da yasyllok ha ka Party, tangwa katkam ka khubor wa da sñiaw da ong wa u Metbah da yoh por u hadooh myntu ka sngi wow hiar chuki dei bor yong oo lym kamtæ daw chah pynhiar chuki noh u.

Related posts

Chah siat uwa pynmynsoo ya ka khynnah skur da ka Chainsaw

November 2, 2026

Yap 9 ngut hadien wa yoo chyrkhei i haap wei pdung ka lieñsuiñ kam u Missile 

November 2, 2026

U Metbah da chimkti u kam u Montri ha ka sorkar MDA-II ha ka 16 tarik u Naikhynde 2025, hei kylliang kaam thymme u Conrad Sangma, hadien wa chah pyndam man Montri noh u Paul Lyngdoh wa u Kyrmen Shylla kiwa man kam ki MLA ka UDP ha kitu ki por.

Hawa kyruiñ won cha ka Montri warim kawa man lehkam ka MLA ka NPP na East Shillong, ka  Ampareen Lyngdoh da em wa ong wa ye ko u yoh biang ya ka chuki Montri, tangwa hadooh kattæ ym pu ye u pyntikna yeini.