Ka Meghalaya and Greater Shillong Progressive Hawkers and Street Vendors Association, da beiñ ko da ki ktien wa eh wei da kyntait ki leh yei pynbaad ka HNLC ya ka Angela Rangad wa ka Biolin Pyrtuh wym em u yieñ ki yei hok ka jaitbru yong i kamjooh yei pynbaad wa chna poisa ki deiwa leh yeini waroh.
Kani ka seiñ kiwa chongdai madan da ong ki wa palat 10 snem da ya kreh ki khlem da sangeh yei hok yong waroh kiwa chongdai madan katkam wa da e ka Constitution ka ri wa katkam ka aiñ Street Vendors (Protection of Livelihoods and Regulation of Vending) Act, 2014.
Da ong leh wa i hok ki jaitbru Ynñiawtrep toh kiwa da e hapoh ka Constitution kamjooh ha ki aiñ wa ki International Convention wei kini toh ki yurim wa ka Association da yieñ ko wow yaleh yei hok ki jaitbru Ynñiawtrep wow yada yei mantre ki yei thaw i bhaw kamjooh wow pynneh pynsah ya ka riti dustur. Da pynrap deiwa ong wa hawa yaleh yei hok ki jaitbru yong i ym mut wow kyntait won yei yong kiwi. Wei du hadien wa yoh yei yada ya waroh hapoh ka aiñ wei wow man salonsor hei khmat kiwa em hei bor daw yoh yei roi i paar, i hok wa i chngaaiñ.
Da ong wa ka Angela Rangad deilang ka Thma U Rangli Juki (TUR) da ki phaw snem da yaleh ki wow yada yei hok kiwa kreh deiwa emlang chirup wa ki yow yada yei khih i khan ki deiwa pynlum pynlang ki najrong kiwi ki snem wa da yaleh yei hok ki kynthai wa i hok manbru longbru ha Meghalaya. Deilang ka TUR, ka Angela Rangad da embynta ko wow yakhih yow yada ya ki khloo ki kjam, ki um ki wah ha Khasi Jaiñtia Hills deilang wow pyrchah yei tih Uranium, i tih mooyong pyrchah aiñ, i chna Dam ha ki wah wei i chah lute ki mar pohkhyndaw. Chooh chooh ka TUR wa ka Angela Rangad da yaleh ko leh neibynta i khooid i suba deiwa yaleh RTI wei deiwa lai rah cha ka Lokayukta yow yada yei hok kiwa chong chnong na ki kaam baam tooh.
Heiyatoh wa i pynbaad wa khrong poisa na kiwa chongdai madan, da ong wa ini toh iwa da pynbaad ki bru da slem yow wanrah yei yapiah yapra wei wow pynsih yei pyrtuid ka Association iwa dadep wow pynyoo wym toh iwa sakhiat wei dadep leh wow e FIR pyrchah ya kni ki bru wa pynbaad. Wei iwa jia kattæ wow pynpoor biang ya kani ka khubor thok wa khrong poisa na kiwa na baar toh i jooh i thmu wei da dawa leh na ka HNLC wow pynsakhiat ko yeini chwa wow pynmih khubor ko.
Da ong leh wa ki kyntien wa da pynemkaam da u Saiñkupar Nongtraw da wanrah ko yei artatien lada em sakhiat uni u bru næ ki bru neibhah da rieh ki du hadien ki khubor wa phah ki neipor cheipor. Kamtæ da kyntu ya ki pulit wow leh ki yeiwa emkaam yow chemdien ya kini kiwa pynpoor ya kam kini ki khubor kiwa thmu wow wanrah yei kulmar donhi.
Ka Association da ban joor ko ya ka yurim wa yieñ ko yow pyntikna wa pynkrehkaam hok ya ka aiñ Street Vendors (Protection of Livelihoods and Regulation of Vending) Act, 2014 katkam wa da thoh da taar ya ka.
Puræ leh: Em kiwa chet kylla ya ka jaitbru Ynñiawtrep yow e laad ya kiwa na baar yow chongdai ki: HNLC
Discussion about this post