Arphaw ngut ki NCC Cadet ka Meghalaya kiwa da mihkhmat yaka North Eastern Directorate haka Republic Day Camp 2024 ha New Delhi, da chah pynkup burom ki ha u Lat ka Meghalaya, u Phagu Chauhan haka 10 tarik uni u bnai ha Raj Bhavan, Shillong.
U Lat hawa e yei klam da yaroh u ya kiwa chah jied wow chimbynta haka Republic Day Parade deiwa ong wa du kiwa pliah dooh kiwa chah jied wei hawa mihkhmat ki yaka Meghalaya da yoh ki leh wow pynyoo pyrthai yaka dustur riti ka jylla haka rynsan wa kynsai bha.
U Lat da ban joor u yei emkaam wow em mynsien wa ryntih wa i mynsien maya ri wei da pynchlur u leh ya ki wow pteiñ yei man kam kiwa yahkhmat lada hei puræ puthi, i yada ri, i sumaar sukhær næ hei tei ri.
U Lat da pynkup burom u leh yaka NCC North East Region Directorate (NER Dte) waka Meghalaya NCC Unit yei kreh chitom neibynta ka ri kamjooh ka imlang sahlang wa neibynta ki NCC.
Ha ka Republic Day Camp kawa da man neibynta waroh ki National Cadet Corps (NCC), da e sikai boon jait wei da jied ya 1,800 ngut na waroh kawi ka ri wei na 1 lak ngut kiwa em ha kylleiñ ki jylla ka North East, ha uni u snem da chah jied 170 ngut napoh ka NER Directorate kiwa da yoh u chimbynta ha kani ka Camp wei na kini ki 20 ngut toh kiwa na Shillong Group.
Ka NCC NER Dte toh kawa em ha waroh ki 7 tylli ki jylla ka North East kawa em palat 1 lak ngut ki NCC wei ha kini ki snem wa daep da em 11 ngut kiwa da psiah ha ki kaam chipai kam ki Officer, 276 ngut kam ki Agniveer wa 120 ngut won da psiah ki chapoh ka CAPF.
Ha kani ka pynkup burom da emlang u Principal Secretary u Lat, u Harish Chandra Chaudhary, IFS, u Additional Director General ka NCC North Eastern Region, u Maj. Gen. Gagan Deep, u Group Commander, NCC Group Shillong, u Brigadier Vijayant Mahadik wa kiwi de.
Discussion about this post