Ka 1st Wailadmiki Shylla Youth Festival wa pynman da ka NPYF 2-Jowai Constituency hajrong ka phang wow yakhun pyrchah yei Drugs wa i kjut HIV, kawa da sdang nadooh ka 5 tarik uni u bnai deiwa pynman ki jait yakob waphær waphær ha deilang ki song poisa cha kiwa jop, da pynkut noh ya ka haka 23 tarik uni u bnai ha madan Thad Mukhla, West Jaiñtia Hills District.
Ki jait yakob wa da sdang chwa kani ka sngi kynthup ki yei phet Marathon, ka Basketball, ka Football wei da pynman ya ki yalehke Final ha ka sngi pynut.
Ha kani ka sngi da sakhi yei chimbynta chongchit ki paidbah ha ki jait yakob waphær nadooh i dat moopoiñ, i yatan tylle, ki Slogan Writing, i chaad, i rwai, i pynher phok wa kiwi kiwi wa da chimbynta da ki kynthai wa chynrang, khynnah wa waheh.
Da sakhi leh yei chongchit ki paidbah wow kyrchaan pyn-eh-daw ya jar jiar ki liang ha kani ka sngi.
U Wailadmiki Shylla uwa man leh kam u Montri ka chnat Sport & Youth Affairs ka sorkar jylla kamjooh u MLA ka 2-Jowai Constituency hawa klam u ha kani ka sngi da kyrpaad u ya ki paidbah wym hoi u boh ki lada em i duna neiliang yong oo kamjooh kiwa pait pynlai ya kani ka Festival neibhah dang man ka sien pyrchang wa nyngkong.
Tangwa toh u pait yei pyrchang wa khian yong oo wa da yaleh u kammon u wanrah ya ki khon khynroo khyllood ka Constituency u yoh ki yei sneiñ i kyntu, kawa man leh ka bynta u ya kyntu kynronglang ya ka yung ka sem ka imlang sahlang.
Pyntip haroh u wa ya kani ka Festival daw pteiñ chooh ka deiwa yooluti u leh wa ha u snem wow wan daw man kawa phooh wa phieñ chooh chooh dei ya krehlang ki paidbah.
Discussion about this post