Shillong: Uwa yahkhmat yaka liangpyrchah u Dr. Mukul Sangma da ong wa chong hei stat ka sorkar jylla wow leh hajrong i thmu yong ka wow pynman ya ka tamasa Meghalayan Age neibhah wa em u khñiang Coronavirus uwa da pynhær syrngu ya ki paidbah ha kylleiñ ka pyrthai wei kamjooh ha India.
Hawa klam ynne ka sngi, u Dr. Mukul da ong u kamwa da sakhi, ka sorkar pyrdi da pynmih ko yei phah ya baroh ki sorkar jylla wow syndong yow yada na u Coronavirus hadien wa da em ki bru kiwa da yoh ya ini u khñiang ha kiwi ki jylla ha ka ri.
Da ong u wa boon ki jylla kiwa da thmu wow pynman ya ki tamasa da pynsangeh noh neibhah wa em uni u khñiang wei ha kani ka jylla Meghalaya, chong ko ha ka sorkar wow pynemkaam ya i stat neibhah wa kam kani ka tamasa kawa heh, da ki spah wa hajar ki bru daw wan ki na kylleiñ ki thaw.
Ka sorkar jylla da thmu ko wow pynman ya ka tamasa Meghalayan Age, nadooh ka 7 tarik hadooh 15 tarik uni u bnai ha Lad Mukhla, West Jaiñtia Hills yow pynku yaka kaam uiñke suwari.
Ha kawi won ka liang, u Dr. Mukul da pyntip u wa da ya phyllu yumut ynne ka sngi wa kiwa pynlai Hotel ha ka jylla nei ktah i thut ka chongsuk chongsaiñ.
Da ong u wa ka sorkar warim ha ki snem 2014-15 da tei ko yei naam ka Meghalaya deiwa kyntu ya ka kaam uiñ pyrthai wei katni da yaklam kammon wow wanrah biang ya kani ka burom wa i dur i dar ka Meghalaya kawa bha cha ka pyrthai hadien wa da mih i jia.
Da ong u wa emkaam wow wanrah yei jai jai i long i man ha ka jylla khnang wow kyntu ya ka yoh ka kot khamtam ka kaam uiñke suwari ha kani ka jylla neibynta i myntoi ki paidbah.
Discussion about this post