Jowai: Ka seiñ All Jaiñtia Students Union (AJSU)- Shillong Circle da pynsñiaw ko yei mynsien wa khia hajrong i chem chitom ki paidbah na ri-loom Jaiñtia dei langær ha ki Hospital ha Shillong, deiwa ong wa kiwa mihkhmat na ri-loom Jaiñtia ym jooh bna ki wow pyrkhat yei emkaam wow booh da ka Ambulance kawa kyrpang neibynta ki paidbah waroh.
Ka seiñ da ong ko wa nadooh u 2011 da chem ko yei chitom ki paidbah wow yoh Ambulance, wei ha kam kini ki por wa emkaam Ambulance ki paidbah jooh phone ki cha ka seiñ.
Manda chem ko yeini i chitom ki paidbah, ka seiñ ha u snem 2014 da lai pynsñiaw ko yeini ha u montri sorkar u Sniawbhalang Dhar wow paan yarap na oo ya ki paidbah kiwa emkaam khamtam hei miet.
Heijooh i por ka seiñ da yachem ko ya u MP u Vincent H. Pala wow kyrpaad wow e Ambulance wei da kular u yeini tangwa ymtip neiyi i daw wa ympu em u e u hadooh katni.
“I wym em ka Ambulance da ktah joor i ya kiwa dooh neibhah wa haap su ki cha kiwi ki Ambulance hadooh T. 5000 næ T. 6000 tangwa deiwa em kani ka Ambulance hapoh ka seiñ haap ki u su ya ka bai phniang wa ka bai driver” da ong u Robert Suja Nongtdu General Secretary AJSU Shillong Circle
Kamtæ ka seiñ da kyntu ko ya ki 7 MLA wow chimkhia ya ini neibynta i paidbah deiwa e da ka Ambulance cha ka seiñ All Jaiñtia Studénts Union – Shillong Circle khnang wow ye won ki u yarap ya ki paidbah.
Discussion about this post