Shillong: U Chief Executive Member (CEM) ka Khasi Hills Autonomous District Council (KHADC), u Hispreaching Son Shylla da ong u wa daw khut u ya ka yalang u wa ki paaid Khasi-Jaiñtia lada em iwon iwon i thmu wow pynthut ya i mynjur ya ka Khasi Hills Autonomous District (Khasi Social Custom of Lineage) (Second amendment) Bill, 2018 wow man ko kam ka aiñ.
“Daw khut i ya ka yalang paidbah na ka Ri Khasi-Jaiñtia waroh kawi lada em iwon iwon i thmu wow pynthut heiwow mynjur ya kani ka Bill wow man aiñ ko,” da ong u Shylla hadien wa yachem ya u Symbood Montri Rangbah, u Prestone Tynsong.
“U Tynsong da kular u wa ka sorkar daw bichaar wei daw puræ bniah bha ko ya kani ka Bill,” da ong u CEM deiwa pynrap wa ha kani ka yachem da kyrpaad wa ka sorkar daw yarap ko wow pynsmat wow yoh u lat u pdiang ya ka wow man ko kam ka aiñ.
Da ong u “Ka sorkar jylla ye ko wow kdaw yei tam i duna ha kani ka Bill lada em iwon iwon, khnang wa ka Council u yoh jo u pynbait ya ini.”
Hawa jubab wa kani ka Bill ye ko wow slem kam ka Village Administration Bill (VAB) wa haap phah cha ka sorkar India, neiliang u Shylla da ong u wa ymye wow leh ya ini wei kani ka Bill toh u yoh pdiang bait ko yei mynjur neibhah man ko wow yada ya ka jaitnru.
U CEM da ong u wa ya kani ka Bill da wanrah ha i por wa biang, khamtam wa ka sorkar Assam da pynbna ko ya ka National Register of Citizens (NRC), wei kani ka Bill daw yada ko na i thmu ki bru wa chah beh na Assam wow psiah cha kani ka jylla.
Chooh chooh da ong u wa ka KHADC daw pait bniah ko ya kiwa synchaar chnong wa ymhoi u tipmit næ e Residential Certificate kulmar ya ki baar jylla.
U Shylla hawa kyntait ya kiwa pyrchah ya kani ka Bill da ong u wa ka Council em ko ka hok wow yada ya ka jaitbru wei ym em wa ye u khang yeini.
Discussion about this post