Da lehkmen ya ka International Women’s Day deiwa pynchlur ya ki kynthai wow wan chakhmat khlem tieñ

Ka District Social Welfare Officer deiwa ya krehlang wa ka District Sankalp Hub for Empowerment of Women (DHEW), West Jaiñtia Hills District, Jowai da lehkmen ki ya ka International Women’s Day ha ka phang pyrdi wa ong, “For All Women and Girls: Rights, Equality, Empowerment” ha ka yalang wa da pynman ha District Library Auditorium, Mynthong, Jowai.

Ha kani ka yalang da lehkmen leh yei dap 10 snem ka Beti Bachao Beti Padhao (BBBP) yow pynkupbor ya ki kynthai wei yow ya ryngkat lang ki.

Da ya emlang ha kani ka sngi ka Additional Deputy Commissioner, ka D.V. Lyngdoh, u Additional Superintendent of Police, u Ishaan Gupta, ki bru chemphang kam ka I. Warjri, Assistant Director, Good Governance Cell, Meghalaya Administrative Training Institute, Shillong wa ka Y. Najiar, District Social Welfare Officer cum District Nodal Officer DHEW, Jowai.

Ka D.V. Lyngdoh da ong ko wa i puræ puthi toh ka laad wow pynkupbor ya ki kynthai yow lait ki nei chah lehbeiñ wei chah leh chiliang, kamtæ da pynchlur ko ya ki bei ki pa wow pyntikna ki wa ki khon ki pyndep ki ya ka puræ puthi khlem da ieh chiteiñ por.

Related posts

Sepai ki 16 tylli ki Satellite wa mut ka Space Agency ka India wow lai booh cha haw-haw

January 12, 2026

Yap uwi hadien wa haap ka Truck na yingkieñ ha u NH-6

January 12, 2026

Neiliang u Ishaan Gupta da ong u wa da kha ya oo hapoh kawi won ka jylla heiwa ka synchaar khadar leh phær bha ko na ka Meghalaya deiwa yaroh ya ki kynthai ka jylla kiwa da embynta ha kiwa boon ki jait kaam nadooh ki kaam sorkar hadooh ki kaam Politics. Da yaroh u leh ya ki dong ki chnat wa da chimbynta ki ha ki kaam pynroi iwa pynyoo yei yatylli ki bru i wym em chem u chawi.

Ka I. Warjri da klam ko heiyatoh wa kiwi boon ki kaam kiwa ktah yei man chngaaiñ ki kynthai kamjooh ki laad yarap nadooh ki aiñ hadooh ki Scheme sorkar. Da klam ko leh yei emkaam u em ki One Stop Centre (OSC) kiwa e yarap smat cha ki kynthai kiwa chah thombor kiwa yarap hadooh wa e duwai, u sumaar, i yarap heiyatoh wa ka aiñ, i yasyllok wei wow e thaw sah wa chipor.

Da batai ko leh ya ka aiñ Protection of Women from Domestic Violence Act, deiwa pynchlur ko ya ki kynthai wow wan ki chakhmat khlem tieñ.  

Kam chibynta kani ka lehkmen, da pynman leh ya ka Signature Campaign.